![](https://newspolar.com/wp-content/uploads/2024/07/FINAL.00_37_39_00.Still038.jpg)
काठमाडौँ । सभामुख देवराज घिमिरेले संसदका आगामी कार्यक्रमबारे संसदका राजनीतिक दलका प्रमुख सचेतकहरुसँग छलफल गर्नुभएको छ ।
बिहीवार सभामुख घिमिरेले संसदमा सहभागी राजनीतिक दलहरुका प्रमुख सचेतकहरुसँग संसदका आगामी कार्यक्रमबारे छलफल गर्नुभएको हो ।
उहाँले प्रधानमन्त्री केपी शर्मा ओलीले साउन ६ गते संसदमा विश्वासको मत लिने र त्यसलाई व्यवस्थित बनाउनेबारे छलफल भएको सत्तापक्षका प्रमुख सचेतक महेश बर्तौलाले बताउनु भयो । उहाँकाअनुसार सभामुख घिमिरेले प्रमुख सचेतकहरुसँग १५ गतेसम्म ६,७ र ८ गते संसद चलाउने, ९,१० र ११ गते समितिको बैठक चलाउने र १३, १४ र १५ गते पुन: संसद सञ्चालन गर्नेगरी १५ दिने कार्यतालिका बनानएको बताउनु भयो । उहाँले समितिमा विचाराधिन विधेयकमा घनीभुत छलफल चलाएर चाँडो भन्दा चाँडो विधेयक संसदमा पठाउने, समितिका खालि सदस्य छिटै पूर्ति गर्ने र संयुक्त समितिमा सदस्य र सभापति पनि छिटै चयन गर्नेगरी सभामुख घिमिरेले छलफल अघि बढाउनुभएको जानकारी दिनुभयो ।
उहाँले भन्नुभयो, ‘आजको खास उद्देश्य ६ गते सम्माननीय प्रधानमन्त्रीज्युले विश्वासको मत लिने सूचना संसद सचिवालयलाई पठाउनुभएको छ, त्यसको आधारमा अघि बढ्ने । अब हामी बैठक कहिलेसम्म गर्छौं, किनभने हामीले प्रत्येक १५ दिनको क्यालेण्डर निर्माण गर्छौं र त्यसअनुसार नै संसद अघि बढाउँछौँ । आजदेखि १५ दिनको बैठक कुन कुन दिन गर्ने, समितिमा रहेका विधेयकलाई काम गर्न समय कसरी उपलब्ध गराउने । यस विषयमा छलफल केन्द्रित भयो । ६,७ र ८ गते तीन दिन संसद बैठक बस्छौँ । ९,१० र ११ गते समितिको बैठक बस्नेगरी समय दिन्छौँ । १३,१४ र १५ गते तीन दिन फेरि संसदको बैठक राख्छौँ । यसरी कुन बैठकमा कुन विषय प्रश्तुत गर्ने पनि तयार पारेको छौँ । समितिमा विचाराधिन विधेयकमा घनीभुत छलफल चलाएर चाँडो भन्दा चाँडो विधेयक हाउसमा आउने वातावरण बनाउने । समितिका सदस्य खालि भएका छन्, ति ठाउँमा आफ्ना आफ्ना सदस्य पदपूर्ति गरिदिन आग्रह गर्ने निर्णय गरेका छौँ । संयुक्त समितिको कामहरु पनि टुंग्याउन विषय राख्नुभएको छ ।’
यता प्रमुख प्रतपिक्ष दल नेकपा (माओवादी केन्द्र) का प्रमुख सचेतक हितराज पाण्डेले सभामुख घिमिरेले संसदको कार्यतालिकाका बारेमा छलफल गर्नुभएको बताउनु भयो । उहाँले ६ गते प्रधानमन्त्री ओलीले विश्वासको मत लिने, ७ गते प्रधानमन्त्रीसँग सांसदको प्रश्नोत्तर हुनेगरी कार्यतालिका बनाउने बारेमा छलफल भएको बताउनु भयो । उहाँले शुक्रवार कार्य व्यवस्था समितिको बैठक बसेर कार्यतालिका टुंग्याउने बताउनु भयो ।
उहाँले भन्नुभयो, ‘सभामुखज्युले हामी प्रमुख सचेतकहरुलाई खासगरी पर्सिदेखिको कार्यतालिाकालाई कसरी व्यवस्थित गर्ने, त्यसपछि विश्वासको मत ६ गते लिने विषयवस्तु छ त्यसलाई कसरी व्यवस्थित गर्ने भन्नेबारेमा गृहकार्यका लागि बोलाउनुभएको हो । भोलि १ बजे कार्य व्यवस्थाको बैठक बस्ने भन्ने निर्णय भएको छ । त्यहाँ नै कार्यतालिका प्रश्तुत हुन्छ, त्यहीअनुसार हामी अघि बढ्छौँ । हरेक १५ दिनमा कार्यतालिका बनाउने जुन हाम्रो अभ्यास छ त्यही अभ्यासअन्तर्गत भोलि बैठक बस्छौँ । ६ गते सम्माननीय प्रधानमन्त्रीज्युले विश्वासको मतको लागि समय माग्नुभएको छ, त्यसअन्तर्गत अघि बढ्छौँ । ७ गते हाम्रो नियमावलीअनुसार प्रत्यक्ष प्रश्नोत्तरको कार्यक्रम छ, त्यो कार्यक्रम ७ गते अघि बढ्छ ।’
उहाँले कार्य व्यवस्था समितिको बैठकबाट संसदका आगामी कार्यक्रम अघि बढाइने बताउनु भयो ।