काठमाडौँ । जिल्ला प्रहरी कार्यालय धनुषाले आर्थिक वर्ष २०८०/०८१ मा ८ सय ७९ फरार प्रतिवादी पक्राउ गरेको छ ।
मंगलवार जिल्ला प्रहरी कार्यालय धनुषाले पत्रकार सम्मेलन गरी विभिन्न घटनाका ८ सय ७९ फरार प्रतिवादी पक्राउ गरेको जानकारी गराएको हो ।
पत्रकार सम्मेलनमा प्रहरी उपरीक्षक भुवनेश्वर तिवारीले ८ सयभन्दा बढी फरार प्रतिवादी पक्राउ गर्नु नै गत आर्थिक वर्षको ठूलो उपलव्धि रहेको बताउनु भयो । त्यसैगरी पत्रकार सम्मेलनमा भन्सार चोरी निकासीमा ९ करोड ५६ लाख ३ हजार भन्दा बढी रकम राजश्व संकलन गरिएको जानकारी समेत दिनुभयो । प्रगति विवरणबारे जानकारी दिँदै प्रहरी उपरीक्षक तिवारीले अवैध लागुऔषधतर्फ गाँजा ६०७.३९९ किलो, ब्राउन सुगर १४१.४६ ग्राम,नाईट्राभेट ट्यावलेट ३ हजार २५८ पिस, सिमप्लेक्स ४९५ क्यापसुल, स्पलेन ३४ बोतल, पेण्डाजोल ईन्जेक्सन–२६ पिस, नूर्फिन ४९९ एनटिजेड, नाईट्राजेपाम–३५४० पिस, नाईट्रोसम–४७ पिस, कोडिवेल– २७ बोतल वरामद गरिएको बताउनु भयो ।
यस्तै साइबर क्राइमतर्फ ३२० वटा निवेदन प्राप्तभएकोमा सम्बन्धित कार्यालयमा २७८ वटा कारवाहीका लागि पठाइएको छ भने ४० वटाको काम सम्पन्न भएको हो । अनुचित लेनदेन मिटरब्याजीतर्फ १ हजार १४५ वटा निवेदन दर्ता भएकोमा ६०२ वटाको मुद्दा फछ्र्यौट भएको, २० वटा मुद्दा दर्ता भएको जानकारी दिँदै उहाँले २५ विग्घाभन्दा बढी जग्गा पिडितलाई फिर्ता गराइएको र २४ करोड ५९ लाखभन्दा बढी रकम साहु महाजनको असुल गराइएको बताउनु भयो ।
जिल्लाका विभिन्न स्थानमा ७४ वटा नयाँ सिसिटीभी जडान र ६२ वटाको मर्मत गराइएको जानकारी दिँदै प्रहरी उपरीक्षक तिवारीले सवारी दुर्घटनामा केही वृद्धि भएपनि जनधनको क्षतिमा न्युनिकरण भएको बताउनु भयो । उहाँले गत तीन वर्षको तथ्यांक हेर्दा पछिल्लो आ।व।मा १ हजार ९० सवारी दुर्घटना भएको र जसमा ७३ जनाको मृत्यु, ४०५ गम्भीर घाइते र १ हजार ३२० जना सामान्य घाइते भएको बताउनु भयो ।
