काठमाडौँ । नवनियुक्त भौतिक पूर्वाधार तथा यातायातमन्त्री देवेन्द्र दाहालले सडक दुर्घटनासम्बन्धि समस्या तत्काल समाधान हुनेगरी काम गर्ने बताउनुभएको छ ।
देशभर सडक दुर्घटनाका कारण ठूलो जनधनको क्षति भइरहेका बेला उहाँले सोमबार सिंहदरबारमा पदभार ग्रहण गर्नेक्रममा सो प्रतिवद्धता व्यक्त गर्नुभएको हो । मन्त्री दाहालले विकास निर्माणको काम ठप्प भइरहेको उल्लेख गर्दै त्यसलाई समाधान हुनेगरी काम गर्ने बताउनु भयो । उहाँले सडकसम्बन्धि नीतिलाई क्रमश: प्राथमिकताको आधार अघि बढाउने पनि बताउनु भयो ।
मन्त्री दाहालले भन्नुभयो, समस्याहरु धेरै छन् । सडक दुर्घटनाका कुराहरु हामीले दिनानुदिन भोगी रहेका छौं । यो विषय हाम्रो मन्त्रालयसँग सम्बन्धित छ । र सडक दुर्घटनालाई कसरी न्यूनिकरण गर्ने ? भन्ने विषय च्यालेन्जिङ विषय छ । त्यसलाई कुन ढंगले गर्नसक्छौ ? तपाईहरुसँग छलफल गरेर समाधान गर्छौं । अर्को राष्ट्रिय यातायात नीति क्याबिनेटमा पठाउने निर्णय गरेका छौं । नीति निर्माण चाहीँ महत्वपूर्ण कुरा हो । जबसम्म नीति बन्दैन, तबसम्म हामीलाई काम गर्न सजिलो पनि हुँदैन ।
मन्त्री पहिलो पटक भएपनि मैले सांसदको रुपमा नीति निर्माणमा नै समय व्यतित गरेको छु । त्यसले गर्दा सडकसँग सम्बन्धित हाम्रा कयौं नीतिहरु छन । त्यसलाई प्राथमिकताको आधारमा अघि बढाउँछौं । अब विकास, निर्माणका कामहरु ठप्प भएका छन । अगाडि बढेका छैनन् भनेर धेरै गुनासो छ । अब आफनो जिम्मेवारीमा त्यो आएको छ । त्यसको अवस्थाको बारेमा हामी मसिनो गरी हेर्नेछौं । र त्यसलाई समाधान गर्ने कुरा क्रमश गर्नेछौं । र ठेकदारहरुले भुक्तानी पाएनन भनेर सडकमा अवरोध खडा गरेको भन्ने सन्दर्भ पनि छ । त्यसको बारेमा पनि हामी छलफल गर्छौं ।
मन्त्री दाहालले पदभार ग्रहण गर्ने क्रममा राष्ट्रिय यातायात नीति मन्त्रीपरिषद् बैठकले पेश गर्ने निर्णय गर्नुभएको थियो ।
