काठमाडौं । सरकारले काठमाडौँ बाहिरिने र भित्रने लामो तथा छोटो दुरीका भाडाका गाडीमा टिकट सिस्टम अनिवार्य गर्ने निर्णय गरेको छ । शुक्रबार गृह मन्त्रालयमा बसेको यातायात व्यवसायीका प्रतिनिधिहरूसँगाको छलफलमा उक्त निर्णय गरेको हो ।
यस्तै, गृह मन्त्रालयले ‘रेड जोन’ मा रात्रिकालीन बस सेवा सञ्चालन नगर्ने निर्णय पनि गरेको छ । मौसम पूर्वानुमान महाशाखाको ३ दिनको मौसम पूर्वानुमानलाई हेरेर भारी वर्षा हुने क्षेत्र अर्थात् रेड जोन एरियामा रात्रिकालीन बस नचलाउने निर्णय भएको गृहसचिव एकनारायण अर्यालले जानकारी दिए ।
त्यसैगरी, पहिरो जाने तथा डुबान हुने सम्भावना देखिएका जोखिमयुक्त क्षेत्रमा सडक विभाग र ट्राफिक प्रहरीले जोखिमका संकेत चिन्ह राख्ने निर्णय भएको गृहसचिव अर्यालले बताए ।
यातायात व्यवसायी एवं यात्रु चालकले सडक अवरुद्ध भएका स्थानको जानकारी लिई त्यस स्थानमा पुग्नु अगावैका सुरक्षित एवं खाद्यान, शौचालय लगायतको व्यवस्था भएका स्थानमै रोकी सडक खुल्ने प्रतीक्षा गर्ने व्यवस्था मिलाउने निर्णय भएको छ ।
