काठमाडौं । पहिरोले बगाउँदा त्रिशूली नदीमा बेपत्ता भएका दुईवटा बस अझैसम्म फेला पार्न सकिएको छैन । नारायणगढ–मुग्लिन सडकको भरतपुर महानगरपालिका वडा २९ स्थित सिमलतालमा लेदोसहितको पहिरो खस्दा त्रिशूली नदीमा आज विहान दुईवटा बस नदीमा खसेका थिए ।
सशस्त्र प्रहरी बल नेपाल, नेपाल प्रहरी र नेपाली सेनाको गोतखोर टोलीले बस खसेको केही बेरमै खोजी सुरु गरे पनि बसको अवस्था पत्ता लाग्न सकेको छैन । त्रिशूलीमा जलसतह उच्च र पानी धमिलो भएकाले खोजीमा समस्या भएको जनाइएको छ ।
बस बगाएर तल पुर्याएको हुनसक्ने आशंकामा देवघाटमा समेत टोली परिचालन गरेर खोजी गरिए पनि फेला पार्न नसकिएको सशस्त्र प्रहरी बलको विपद् व्यवस्थापन शिक्षालय कुरिनटारका एसएसपी माधव पौडेलले बताए ।
दुर्घटनास्थलबाट करिब २ सय मिटर तलसम्म गएर सशस्त्र प्रहरीका ३ वटा बोट र नेपाली सेनाको १ वटा बोटमार्फत गोताखोरको टोली त्रिशूली नदीमा गएर खोजी कार्य गरिरहेको उनले बताए ।
पानीको अत्यधिक चाप र धमिलो भएकाले नदीको गहिराइसम्म गोताखोर पुग्न सक्ने अवस्था नभएकोले चुम्बकको प्रयोग गरि बसको खोजी सुरु गरिएको उनले बताए
सिमलतालमा आज बिहान वीरगञ्जबाट काठमाडौंतर्फ आउँदै गरेको बागमती प्रदेश–०३–००६ ख १५१६ नम्बरको एन्जल डिलक्स बस र काठमाडौंबाट गौरतर्फ जाँदै गरेको बागमती प्रदेश–०३–००१ ख २४९५ नम्बरको बसलाई पहिरोले बगाएको थियो । बसबाट तीन यात्रु पौडेर निस्किएका थिए । बाच्न सफल भएका तीनमध्ये एकजनाको भरतपुर अस्पतालमा र दुईको चितवन मेडिकल कलेजमा उपचार भइरहेको छ ।
