• २९ असार २०८१, शनिबार
  •      Sat Jul 13 2024
  •   Unicode
Logo

संसदीय छानबिन विशेष समितिले आज सहकारी पीडितसँग छलफल गर्दै



काठमाडौं । सहकारी संस्था बचत रकम दुरुपयोग संसदीय छानबिन विशेष समितिले आज पीडितहरूसँग छलफल गर्दै छ । हिजो बसेको समितिको बैठकले आज ११ बजे पीडितहरुसँग छलफल गर्ने निर्णय गरेको थियो ।

सिंहदरबारमा बस्ने बैठकमा सहकारीका पीडितहरूसँग प्रतिनिधिमूलक ढङ्गले छलफल गर्ने तयारी छ । आजको बैठकमा सहकारीका पीडितका समस्याबारे जानकारी आउन सक्ने अपेक्षा समितिले गरेको छ ।

समितिले २९ वटा सहकारीमाथि छानबिन गर्ने जिम्मेवारी पाएको छ । आज सबै सहकारीका पीडितहरुलाई बैठकमा बोलाइएको छ । पीडितहरूसँग छलफल गरी त्यहाँभित्रको समस्या समाधानका लागि थप तथ्यहरूको खोजी गर्ने काम हुने पनि विशेष समितिले जनाएको छ ।

सबै पीडितलाई बोलाएर छलफल गर्न सम्भव नहुने भएकाले प्रतिनिधिमूलक ढंगले छलफल गर्न लागिएको हो । संघर्ष समितिका रूपमा, व्यक्तिगत रूपमा अनेक हिसाबले सहकारीबाट पीडित रहेका पीडितहरूको कुरा सुन्ने कार्यक्रम समितिले बनाएको हो ।

विशेष समितिले यसअघि सम्बन्धित निकाय र विज्ञहरूसँग छलफल गरेको थियो । अब पीडितहरूसँग पनि छलफल गरी सहकारी क्षेत्रमा देखिएको समस्या र समाधानको उपायहरूको खोजी गरिने समितिले जनाएको छ ।