काठमाडौं । पृथ्वीराजमार्गअन्तर्गत कृष्णभीर सडकखण्ड दुईतर्फी रूपमा सञ्चालनमा आए पनि सडक विभागले त्यसलाई दीर्घकालीन रूपमा सुरक्षित र सञ्चालनयोग्य बनाउने काम अघि बढाउने भएको छ ।
सडक विभागका सिडिइ सुरेश पौडेलका अनुसार अहिले सडक सञ्चालनमा ल्याउनु तत्कालीन समाधान मात्रै हो । कृष्णभीरको जोखिम स्थायी रूपमा न्यूनीकरण गर्न सडकको माथिल्लो भागमा पानी व्यवस्थापन, सम्भावित पहिरो नियन्त्रण तथा तल्लो भागमा त्रिशूली नदीको कटानबाट सडक जोगाउने संरचना निर्माण गर्नुपर्ने अवस्था रहेको उहाँले बताउनुभयो ।
पौडेलका अनुसार दीर्घकालीन व्यवस्थापनका लागि माथिल्लो स्लोपबाट पानीको उचित निकास व्यवस्थापन गर्ने, सम्भावित पहिरो नियन्त्रणका संरचना निर्माण गर्ने तथा नदी कटान नियन्त्रणका उपायबारे अध्ययन सुरु भइसकेको छ । आवश्यक परीक्षण, डिजाइन तथा अन्तिम योजना तयार गर्न भने केही समय लाग्ने उहाँको भनाइ छ ।
कृष्णभीरको दीर्घकालीन विकल्पका रूपमा सुरुङ निर्माण गर्ने वा त्रिशूली नदीपारि वैकल्पिक सडक निर्माण गर्ने विषयमा समेत छलफल भइरहेको छ । तर वैकल्पिक संरचना निर्माण गर्न समय लाग्ने भएकाले हाल सञ्चालनमा ल्याइएको सडकलाई कम्तीमा तीन वर्ष सुरक्षित रूपमा सञ्चालनयोग्य बनाउने गरी काम गर्नुपर्ने पौडेलले बताउनुभयो ।
उहाँले माथिल्लो स्लोपबाट पानी व्यवस्थापन गर्नु चुनौतीपूर्ण रहेको बताउँदै जुनसुकै बेला स्लोप फेल भएर पहिरो जान सक्ने जोखिम रहेको उल्लेख गर्नुभयो । साना पहिरोका कारण एक–दुई घण्टासम्म सडक अवरुद्ध हुन सक्ने अवस्था न्यूनीकरण गर्ने विषयमा पनि छलफल सुरु भइसकेको उहाँको भनाइ छ ।
यसैबीच, अहिले ग्राभेल गरिएको सडकलाई वर्षा सकिएलगत्तै कालोपत्रे गर्ने तयारी सडक विभागले गरेको छ । कालोपत्रेका लागि अस्फाल्ट वा अन्य उपयुक्त प्रविधि प्रयोग गर्ने विषयमा छलफल भइरहेको पौडेलले जानकारी दिनुभयो । सडक सञ्चालनसँगै ट्राफिक सुरक्षाका थप मापदण्डसमेत लागू गरिने विभागले जनाएको छ ।
नेपाल निर्माण व्यवसायी महासंघका उपाध्यक्ष शहदेव खड्काका अनुसार कृष्णभीर सडकखण्ड दुईतर्फी सञ्चालनमा आए पनि माथिबाट पहिरो तथा माटोका अवशेष खस्ने जोखिम भने कायमै छ । वर्षा हुँदा माथिल्लो भागबाट डेब्रिज खस्न सक्ने सम्भावना रहे पनि त्यसलाई तत्काल व्यवस्थापन गरेर सडक लामो समय अवरुद्ध हुन नदिने अवस्था बनाइएको उहाँले बताउनुभयो ।
खड्काका अनुसार कृष्णभीरमा तत्कालका लागि सडक सञ्चालन गर्न आवश्यक काम सम्पन्न भइसकेको छ । करिब ११ दिनको प्रयासपछि सडकलाई दुईतर्फी रूपमा सञ्चालनमा ल्याइएको उहाँले बताउनुभयो । सडक निर्माणका क्रममा सोल ड्रेन, ग्रेड कटिङ, सबग्रेड तथा सडक सुरक्षाका मापदण्ड अपनाउनुपर्ने भएकाले काम सम्पन्न गर्न केही समय लागेको उहाँको भनाइ छ ।
अहिले मालवाहक, सार्वजनिक तथा निजी सवारीसाधनसँगै ग्यास बुलेटसमेत सहज रूपमा आवतजावत गरिरहेको खड्काले जानकारी दिनुभयो । माथिबाट डेब्रिज खसे पनि त्यसलाई हटाएर केही समयपछि पुनः सडक सञ्चालन गर्न सकिने उहाँले बताउनुभयो ।
यसैबीच, बाढीबाट पृथ्वीराजमार्गका विभिन्न खण्डमा भएको क्षतिको मूल्यांकन गर्न विश्व बैंकको प्राविधिक टोलीले स्थलगत निरीक्षण गर्ने भएको छ । खड्काका अनुसार कृष्णभीरसहित शीतलबजार, पोखरेभीर, पाङ्ग्रे र गलौँदीलगायत क्षेत्रमा बाढीले सडकमा क्षति पुर्याएको छ ।
विश्व बैंकको प्राविधिक टोलीले ती क्षेत्रको क्षतिको अवस्था अध्ययन गरी सडकलाई थप व्यवस्थित र सुरक्षित बनाउने उपायबारे मूल्यांकन गर्नेछ । निरीक्षणमा सडक विभाग, परामर्शदाता तथा निर्माण व्यवसायीको टोलीसमेत सहभागी हुने खड्काले बताउनुभयो ।
