काठमाडौँ । गुयानाको प्रोभिडेन्स स्टेडियममा आज टी–२० विश्वकपको दोेस्रो सेमिफाइनलमा भारतले इंग्ल्याण्डको सामना गर्नेछ । गुयानामा हुन लागेको यो हाई भोल्टेज खेल नेपाली समय अनुसार बेलुकाको ८:१५ बजेबाट सुरु हुँदैछ ।
म्याचको दिन गुयानामा वर्षा हुने सम्भावना ७० प्रतिशत छ तर त्यहाँ कुनै रिजर्भ डे छैन । रिजर्भ डे नहुने भए पनि खेलका लागि २५० मिनेटको अतिरिक्त समय दिइएको छ । त्यसैले बेलाबेलामा वर्षा रोकिन थाल्यो भने खेल कुनै न कुनै रुपमा टुंगिन सक्छ ।
खेल नभएमा भारतीय टोली सुपर–८ राउण्डमा समूहको शीर्ष स्थानमा रहेकाले फाइनलमा पुग्ने छ । इङ्ल्यान्ड टोली आफ्नो समूहमा दोस्रो स्थानमा रहेकोले हार बेहोर्न सक्छ।
भारत र इंग्ल्याण्डको खेल गुयानामा स्थानीय समय अनुसार बिहान १०:३० बजे सुरु हुनेछ । करिब ४:३० घन्टाको अतिरिक्त समय पनि थप भयो भने खेल पूरा गर्न साँझ ६ देखि ७ बजेसम्मको समय हुनेछ ।
यदि टी २० खेलमा पानी पर्न थाल्यो भने, डिएलए विधि प्रयोग गर्न दुवै इनिङ्समा कम्तिमा ५ ओभर खेल्न आवश्यक छ। तर आईसीसीको नियम अनुसार सेमिफाइनल र फाइनलमा डिएलए विधिका लागि कम्तिमा १०–१० ओभरको खेल हुनुपर्ने हुन्छ ।
अर्थात् आजको कुनै पनि सेमिफाइनलमा वर्षा भएमा नतिजा पाउन १०–१० ओभरको खेल आवश्यक छ । एक इनिङ्समा १० ओभर बलिङ गर्न ४५ देखि ५५ मिनेटको समय हुन्छ। १०–१० ओभरको खेल डेढ देखि दुई घण्टामा पूरा गर्न सकिन्छ अर्थात् गुयानामा २ घण्टाको खेल भए पनि नतिजामा पुग्न सकिन्छ ।
मौसम वेबसाइटको अनुसार, गुयानामा आज दिनभर ७५ प्रतिशत सम्म वर्षा हुने अपेक्षा गरिएको छ। शहरमा बिहान ९ बजे ४० प्रतिशत, १० बजे ६६ प्रतिशत, ११ बजे ७५ प्रतिशत र दिउँसो १२ बजे ५० प्रतिशतसम्म वर्षाको सम्भावना रहेको छ । खेल बिहान १०:३० बजे सुरु हुने तालिका छ । पहिलो ३ घण्टामा ५० प्रतिशत भन्दा बढी वर्षाको सम्भावना छ।
दक्षिण अफ्रिका र अफगानिस्तानबीचको पहिलो सेमिफाइनलको लागि रिजर्भ डे थियो । तर, वर्षाले खेलमा कुनै बाधा नआएपछि खेल २ घण्टामै सकिएको थियो । अफगानिस्तानलाई ९ विकेटले पराजित गर्दै दक्षिण अफ्रिका फाइनलमा प्रवेश गरिसकेको छ ।
दोस्रो सेमिफाइनलको लागि भने रिजर्भ डे छैन । दिनको खेल र समय अभावका कारण रिजर्भ डे नराखिएको बुझिएको छ । समय अभावका कारण २७ जुनमा दोस्रो सेमिफाइनलमा रिजर्भ डेको सट्टा २५० मिनेट अतिरिक्त समय दिइएको थियो । २९ जुनमा फाइनल तोकिएको छ ।
सेमिफाइनलको खेल बराबरी भएमा समूह चरणको नियम जस्तै नकआउटमा पनि सुपर ओभरको प्रयोग हुनेछ । यदि सुपर ओभर पनि टाई रह्यो भने अर्को सुपर ओभर हुनेछ।
