एजेन्सी । अखिल भारतीय फुटबल महासंघ (एआईएफएफ) ले भारतीय पुरुष फुटबल टोलीका मुख्य प्रशिक्षक इगोर स्टिम्याकलाई प्रशिक्षक पदबाट हटाएको छ ।
हालै, इगोर स्टिमाकको प्रशिक्षकमा भारत फिफा विश्वकप २०२६ को छनोटको तेस्रो राउन्डमा प्रवेश गर्न असफल भयो र एएफसी एसियन कप २०२४ को समूह चरणबाटै बाहिरियो ।
फिफा विश्वकप २०२६ को छनोटमा निराशाजनक प्रदर्शन गरेपछि एआईएफएफले यो निर्णय गरेको हो । कार्यवाहक महासचिव एम. सत्यनारायणले फिफा विश्वकप २०२६ को छनोट अभियानमा सिनियर पुरुष राष्ट्रिय टोलीको खराब प्रदर्शनलाई ध्यानमा राख्दै एआईएफएफ सदस्यहरूले सर्वसम्मतिले नयाँ मुख्य प्रशिक्षकको नियुक्ति धेरै महत्त्वपूर्ण भएको बताए ।
१९९८ फिफा विश्वकपमा क्रोएसियाका लागि कांस्य जित्ने इगोर स्टिमाकले १५ मे २०१९ मा भारतको मुख्य प्रशिक्षकको जिम्मेवारी सम्हालेका थिए । मुख्य प्रशिक्षकको रूपमा इगोरको अन्तिम कार्यकाल फिफा विश्वकप २०२६ को क्वालिफायर थियो । हालै सम्पन्न क्वालिफायर खेलमा भारतीय टोली कुवेत र अफगानिस्तान जस्ता टिमसँग संघर्षरत देखिएको थियो ।
इगोरले आफ्नो निर्णय, टोली चयन र खेल व्यवस्थापनका लागि सधैं आलोचनाको सामना गर्नुपर्यो । ५६ वर्षीय इगोर स्टिमाकले २०१९ मा पूर्व भारतीय प्रशिक्षक स्टेफन कन्स्टेन्टाइनको बिदाइपछि भारतीय टोलीको नेतृत्व सम्हालेका थिए ।
उनको नेतृत्वमा, भारतले दुईवटा साफ च्याम्पियनसिप, एक इन्टरकन्टिनेन्टल कप र एक त्रि-देशीय शृङ्खला सहित चार प्रमुख ट्रफीहरू जित्यो । उनले भारतलाई सन् २०२३ मा साफ च्याम्पियनसिप र इन्टरकन्टिनेन्टल कप सहित तीनवटा कप जिताए । तर उनको खेल योजनामा सधैं प्रश्नहरू रह्यो ।
भारतको फिफा विश्वकप २०२६ मा पुग्ने आशा सकिएको छ । छनोट खेलमा कतारसँग २–१ ले पराजित भएको थियो । अर्को फिफा विश्वकप सन् २०२६ जुन ११ देखि संयुक्त राज्य अमेरिका, मेक्सिको र क्यानडामा हुने तय भएको छ । गत मंगलबार दोहाको जसिम बिन अहमद स्टेडियममा भारत र कतारबीचको खेल भएको थियो । यस खेलमा भारतीय टोलीले सुरुदेखि नै अग्रता लिएको थियो ।
तर, अन्त्यमा कतारले खेल २–१ ले जित्यो । योसँगै भारत विश्वकप छनोटको तेस्रो राउण्डमा पुग्नबाट बञ्चित भएको छ ।
