एजेन्सी । इस्टोनियाका साहिल चौहान टी–२० अन्तर्राष्ट्रियमा सबैभन्दा छिटो शतक बनाउने ब्याट्सम्यान बनेका छन् । साहिलले साइप्रसविरुद्ध २७ बलमा शतक बनाएर नयाँ विश्व कीर्तिमान बनाएका छन् ।
खेल सोमबार साइप्रसको इपिस्कोपीमा भएको थियो । साहिलले ४१ बलमा १४४ रनको इनिङ खेले । जसमा ६ चौका र १८ छक्का सामेल थिए । साहिलको यही इनिङको आधारमा इस्टोनियाले १३ ओभरमा १९१ रनको लक्ष्य पछ्यायो । साइप्रसमाथि ६ विकेटले विजयी भयो ।
साहिलले चार महिनाअघि नामिबियाका ब्याट्सम्यान जान निकोल लोफ्टी–इटनले बनाएको कीर्तिमान तोडे । इटनले त्रिदेशीय शृङ्खलाको पहिलो खेलमा नेपालविरुद्ध मात्र ३३ बलमा शतक पूरा गरेका थिए । उनले ३६ बलमा १०१ रन बनाए । ईटनको इनिङ्समा ११ चौका र ८ छक्का समावेश थियो ।
आफ्नो शानदार ब्याटिङका साथ साहिलले वेस्ट इन्डिजका विस्फोटक ब्याट्सम्यान क्रिस गेलको कीर्तिमान पनि तोडे । सन् २०१३ को आईपीएलमा रोयल च्यालेन्जर्स बैंग्लोर (आरसीबी)बाट खेलिरहेका गेलले पुणे वारियर्सविरुद्ध मात्र ३० बलमा शतक बनाएका थिए ।
उनले भारतका विकेटकिपर ब्याट्सम्यान ऋषभ पन्तलाई पनि पछाडि छोडे, जसले २०१८ मा दिल्लीबाट खेल्दा हिमाचल प्रदेशविरुद्ध ३२ बलमा शतक बनाएका थिए ।
६ खेलको टी–२० सिरिजमा इस्टोनियाले २–० को अग्रता बनाएको छ । अब दुवै टोलीबीच तेस्रो र चौथो टी–२० खेल मंगलबार हुनेछ ।
