काठमाडौ । वरिष्ठ कलाकार हरिवंश आचार्यलाई खासै नपुग्दो त केही थिएन ।
तैपनि एक दिन विद्युतीय रिक्सा चलाउँदै टुँडिखेलतिर भौंतारिंदै थिए । त्यही बेला उनी आफ्नो भाग्य कस्तो छ भन्दै देखाउन एउटा ज्योतिषकोमा पुग्छन् । जुन ज्योतिष आफ्नै भाग्य र भविष्यका बारेमा अन्योलमा छ । त्यही स्थानमा पिँजडाबाट निस्केर सुगाले मान्छेको भाग्य बताउने गर्थ्याे ।
एक सहकर्मीलाई साथमा लिएर बिन्दास डुल्दै गरेका आचार्यलाई ज्योतिषको भविष्यवाणीप्रति निकै आशा छ ।
त्यसैले त भन्दैछन् –
एउटा कुरा कसैलाई नि भन्नु हुँदैन,
यो कुरोलाई गीत बनाएर गाउन मिल्दैन ।
गाउन मिल्दैन भन्दा भन्दै पनि आचार्यले सही कुुरा गीतमा नै व्यक्त गरेका छन् । भनिन्छ नि कसैलाई पनि नभन्नु भन्दै सबैलाई भनेको कुरा जस्तै । आखिर ज्योतिषले के भनेछन् त ?
आचार्यलाई उनले भनेका छन् –
टुँडीखेलमा हात देखाउँदा ज्योतिषेले धनी हुन्छ भने
टुँडीखेलमा हात देखाउँदा ज्योतिषेले चुनाव लड्न भने ।
मुलुकमा यतिबेला हुने नहुने चुनावको चर्चा छ । तर पनि आचार्यलाई ज्योतिषले चुनाव लड्ने सल्लाह दिइसकेका छन् । आखिर चुनाव लडेर के गर्लान् त ? भ्रष्टाचार महापाप हो, गर्दै गर्न हुन्न, भ्रष्टाचार गरेर त दुई पैसा नि छुन्न, घुसचाहिँ शाकाहारी खान हुन्छ भन्छन्, अन्त जान पर्दैन घरमै ल्याइदिन्छन् । जुन नेपाली राजनीतिको पर्याय जस्तै बनेको छ ।
कम्बल ओडेर ध्यु खाने नेताहरुको प्रवृत्तिलाई आचार्यले राम्रोसँग दनक दिएका छन् ।
गीतमा आचार्य भन्छन् —
भ्रष्टाचारको नेपालमा नाम नि लिन हुन्न,
रोक्नुपर्छ भष्टाचारको जालो अब बुन्न,
कमिसनचाहिँ स्वास्थ्यवर्द्धक खानै पर्छ भन्छन्,
खान्न खान्न भन्छु म त साह्रै कर गर्छन् ।
नेता र बिचौलिया अरुका अगाडि इमान्दार देखाउन खोज्ने तर धन्दा नछाड्ने कुरालाई हरिवंशले राम्ररी उजागर गरेका छन् । म्युजिक भिडियोसहित हालै सार्वजनिक भएको हरिवंशका गीतले नेपाली समाजको छोप्न खोजिएको तर सर्बत्र उदाङ्गो भएको घटना सार्वजनिक गरेको छ ।
विभिन्न भाव भंगीमा प्रस्तुत चरित्र माथि पूर्ण न्याय गर्दै आचार्यले पात्र र चरित्र अनुसार आवाजमा पनि न्याय गरेका छन् । सागरराज शर्माको निर्देशनमा बनेको म्युजिक भिडियोमा किरण तुलाधर, विकास भट्टराई, शशीकुमार खड्का र मुकुन्द अधिकारीले अभिनयमा साथ दिएका छन् । किरण तुलाधरको संगीत संयोजन रहेको गीतलाई सत्यदीप केसीको छायांकन, बिजु प्रजापतिको छायांकन निर्देशन र रामकाजी कँडेल (गणेश) को सम्पादनले झनै उत्कृष्ट बनाएको छ ।
