एजेन्सी । बलिउड अभिनेता सलमान खानमाथि आक्रमण गर्ने प्रयासलाई मुम्बई प्रहरीले फेरि असफल बनाएको छ ।
पनवेलमा सलमानको कारमा आक्रमण गर्ने योजना बनाएका लरेन्स बिश्नोईको गिरोहका चार जनालाई मुम्बई प्रहरीले पक्राउ गरेको छ ।
अभियुक्तहरुको पहिचान धनन्जय उर्फ अजय कश्यप, गौरव भाटिया उर्फ न्हाई, वास्पी खान उर्फ वासिम चिकना र जिशान खान उर्फ जावेद खानको रुपमा गरिएको छ ।
चारै जना विरुद्ध आईपीसीको धारा ११५, १२० (बी), ५०६ अन्तर्गत मुद्दा दर्ता गरिएको छ । प्रहरीले लरेन्स बिश्नोई, अनमोल बिश्नोई, गोल्डी ब्रार लगायत १८ जना विरुद्ध एफआईआर दर्ता गरेको छ ।
प्रहरीका अनुसार चार अभियुक्तले पाकिस्तानबाट हतियार सप्लायरमार्फत हमला गराउने योजना बनाएका थिए । मिडिया रिपोर्टका अनुसार आक्रमणकारीहरूले एके ४७ र एम–१६ प्राप्त गर्ने प्रयास गरिरहेका थिए । उनीहरुले सलमानको फार्म हाउस र धेरै शुटिङ स्पटको रेकी गरेका थिए । प्रहरीले उनीहरुको मोबाइलबाट यस्ता धेरै भिडियो पनि बरामद गरेको छ ।
यी चारैले सलमानको घर र फार्महाउसको रेखदेख गरेका थिए । जसमध्ये अजय कश्यपले पाकिस्तानमा बस्ने डोगर नामका व्यक्तिलाई भिडियो कलमार्फत सम्पर्क गरेका थिए । उनी त्यहाँबाट एके ४७ लिएर सलमानमाथि आक्रमण गर्न जाँदै थिए ।
यस बाहेक मुम्बई, रायगढ, नवी मुम्बई, ठाणे, पुणे र गुजरातबाट लरेन्स बिश्नोई र सम्पत नेहरा गिरोहका करिब ६० देखि ७० जना गुण्डाहरू सलमान खानमाथि नजर राखिरहेको जानकारी पनि प्रहरीले पाएको थियो ।
उनीहरुले नाबालिग मार्फत सलमानमाथि आक्रमण गर्ने योजना बनाएका थिए । आक्रमणपछि उनीहरुको योजना कन्याकुमारीबाट डुङ्गा चढेर श्रीलंका जाने थियो ।
यसअघि १४ अप्रिलमा बान्द्रास्थित सलमान खानको ग्यालेक्सी अपार्टमेन्ट अगाडि बिहान ५ बजे गोली चलाइएको थियो । दुईवटा मोटरसाइकलमा आएका आक्रमणकारीले ५ राउण्ड फायर गरेका थिए ।
