एजेन्सी । बलिउड स्टार तथा आईपीएल टिम कोलकाता नाइट राइडर्सका सह–मालिक शाहरुख खानलाई हिट स्ट्रोक भएपछि अहमदाबादको एक अस्पतालमा भर्ना गरिएको थियो ।
मंगलबार राति उनको स्वास्थ्य बिग्रिएपछि शाहरुखलाई मे २२ तारिख बुधबार अहमदाबादको केडी अस्पताल लगिएको थियो, जहाँ उनको स्वास्थ्य परीक्षण गरिएको थियो । अब अभिनेताको स्वास्थ्यसँग सम्बन्धित नयाँ जानकारी बाहिर आएको छ ।
हिजो अभिनेता अस्पतालबाट डिस्चार्ज भएको खबर आएपनि अहिले भने किङ खान अस्पतालमा उपचाररत रहेको र अहिलेसम्म डिस्चार्ज नभएको जानकारी आएको छ । हिट स्ट्रोकबाट पीडित शाहरुख खान अहमदाबादको एक अस्पतालमा उपचार गराइरहेका छन्, बिहीबार अर्थात् आज डिस्चार्ज हुने सम्भावना छ, एक प्रहरी अधिकारीले भने ।
यद्यपी निजी अस्पतालले शाहरुख खानको स्वास्थ्य अवस्थाबारे अहिलेसम्म कुनै वक्तव्य जारी गरेको छैन । अभिनेतालाई बुधबार मल्टिस्पेशलिटी केडी अस्पतालमा भर्ना गरिएको थियो । उनी मंगलबार नरेन्द्र मोदी स्टेडियममा कोलकाता नाइट राइडर्स (केकेआर)टोलीको इन्डियन प्रिमियर लिग (आईपीएल) खेलमा सहभागी हुन अहमदाबाद आएका थिए ।
अहमदाबादका पुलिस अधीक्षक ओम प्रकाश जाटले भने, ‘खान अझै अस्पतालमा उपचाररत छन् । उनी आजै डिस्चार्ज हुने सम्भावना छ ।’ गुजरातका धेरै भागहरू विगत केही दिनदेखि अत्यधिक गर्मीको चपेटामा छन् ।
केकेआरले मंगलबार क्वालिफायर १ मा सनराइजर्स हैदरावादलाई ८ विकेटले पराजित गर्दै चौथो पटक आईपीएलको फाइनलमा प्रवेश गरेको छ । केकेआरका अधिकारीले सेयर गरेको भिडियोमा शाहरुख खानले पनि स्टेडियममा फ्यान र खेलाडीलाई अभिनन्दन गरेका थिए । अब केकेआरले आइतबार चेन्नईमा फाइनल खेल्नेछ ।
