जीवनको भोगाई स्मरण गर्दै विजयले भने – यस्तो दिन पनि देखेँ जब खानका लागि केही पनि थिएन

एजेन्सी । बलिउड अभिनेता विजय राजले हालै आफ्नो खराब दिनको बारेमा कुरा गरेका छन् । उनले आफूसँग खानाका लागि पैसा पनि नभएको समय रहेको बताए । तर, विजयले यसलाई संघर्ष भनेका छैनन् । हरेक पेशामा शीर्षमा पुग्नका लागि यी कुराहरु पार गर्नुपर्ने उनको विश्वास छ ।

विजयले सन् १९९९ मा फिल्म भोपाल एक्सप्रेसबाट आफ्नो करियर सुरु गरेका थिए । योसँगै उनले मीरा नायरको फिल्म मनसुन वेडिङबाट ठूलो पहिचान पाए । त्यसपछि उनी गंगुबाई काठियावाडी, रघु रोमियो, मेड इन हेभेन जस्ता फिल्म र सिरिजमा देखिए । हालै उनी ‘मर्डर इन माहिम’ सिरिजमा देखिएका छन् ।

जुम इन्टरटेनमेन्टसँगको अन्तर्वार्तामा विजय राजले भने, ‘वास्तविक संघर्ष भनेको सुरक्षा गार्डले मासिक १२ हजार रुपैयाँ कमाएर परिवारलाई सहयोग गर्नु हो । यद्यपि उनी सुरक्षा गार्ड बन्न चाहँदैनन्, उनी त्यसो गर्न बाध्य छन् किनभने उसले गर्नुपर्छ । सबैलाई आफ्नो गन्तव्य छनौट गर्ने स्वतन्त्रता छैन । १ प्रतिशत भन्दा कम मानिसमा यो स्वतन्त्रता छ । जस्तो कि तपाई अभिनेता बन्न चाहानुहुन्छ र त्यसका लागि काम पनि गर्दै हुनुहुन्छ । चाहे तपाईं सफल हुनुहुन्छ वा हुनुहुन्न, तपाईं जे गर्न चाहानुहुन्छ त्यही गरिरहनुभएको छ ।’

विजयले थपे, ‘जीवन संघर्ष हो । यदि तपाईसँग साइकल छ तर कार चाहियो भने, त्यो पनि संघर्ष हो । मानिसहरुका अनुसार सफलता भनेको तपाईसँग कति घर, कति कार छन् भन्ने हो । तर, मलाई पटक्कै विश्वास लाग्दैन । मेरो अनुसार, यदि तपाईं शान्त हुनुहुन्न भने, तपाईं असफल हुनुहुन्छ ।’

विजयले आफूसँग खानेकुरा नभएका दिनहरू भोगेको तर त्यसले केही फरक नपरेको बताए । उनले भने, ‘खान धेरै नहुँदा पनि रमाइलो गरिरहेको थिएँ । म भविष्यको बारेमा धेरै सोच्दिनँ ।’