काठमाडौं । आगामी निर्वाचनका विषयमा दलहरुसँग छलफल गर्न निर्वाचन आयोगले आज सर्वदलीय छलफल गर्ने भएको छ । कान्तिपथस्थित आफ्नै कार्यालयमा छलफलका लागि दलका प्रतिनिधिहरुलाई आयोगले बोलाएको आयोगका प्रवक्ता राजकुमार श्रेष्ठले जानकारी दिनुभयो । प्रवक्ता श्रेष्ठका अनुसार आगामी निर्वाचन, मतदाता नामावली, मतदान स्थल तथा मतदान केन्द्रका विषयमा दलहरुसँग छलफल गर्न लागिएको हो ।
आयोगले नेकपाका दुवै पक्ष, नेपाली कांग्रेस, जनता समाजवादी पार्टी, राष्ट्रिय प्रजातन्त्र पार्टी, राष्ट्रिय जनमोर्चा, नेपाल मजदुर किसान पार्टी, साझा पार्टी, नेकपा ९माले०, नेपाल संघीय समाजवादी पार्टी, राष्ट्रिय मुक्ति पार्टी, नेपाली जनता दल, संघीय लोकतान्त्रिक राष्ट्रिय मञ्च, बहुजन शक्ति पार्टी र नेपाल परिवार दललाई पत्र पठाएर निर्वाचन हेर्ने दुई–दुई जना प्रतिनिधि पठाइदिन भनेको छ ।
प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले गत पुस ५ गते प्रतिनिधिसभा विघटन गर्नुभएको र आउँदो माघ १७ र २७ गते मध्यावधि निर्वाचन नै घोषणा गर्नुभएको छ । प्रतिनिधिसभा विघटन पश्चात प्रधानमन्त्री ओलीको चौतर्फी आलाचना पनि भईरहेको छ । त्यस्तै नेकपा पार्टि पनि दुई भागमा विभाजन भई ओली पक्ष र प्रचण्ड–नेपाल पक्ष भएको छ ।
