काठमाडौं । काठमाडौं महानगरका मेयर विद्यासुन्दर शाक्यले त्वा खल ओमबहाःया त्वा छेँ को शिलान्यास गर्नुभएको छ । आज विहान वडा २३ ओमबहालमा मेयर शाक्यले शिलान्यास गर्नुभएको हो । भवनको लागत अनुमान १ करोड ३९ रुपैयाँ थियो । खरिद प्रक्रियामा भएको प्रतिस्पर्धामा निर्माण पक्षले ८६ लाख रुपैयाँमा निर्माण कबोल गरेको छ । यही अनुस्प सम्झौता भइसकेको छ ।
३ आना जग्गा निर्माण हुने साढे ४ तलामध्ये पहिलो चरणमा ३ तला बनाइनेछ । गुठीले जग्गा खरिद गरेर प्राप्त गरेको हो ।
भवन शिलान्यास समारोहमा बोल्दै मेयर शाक्यले, मूर्त अमूर्त सम्पदा निर्माण, पुननिर्माण र संरक्षणका लागि माग भएका सबै योजनामा महानगरले आर्थिक दायित्व बोकेको बताउनुभयो । ‘सम्पदा बचाउने काम हाम्रै हो । त्यो दायित्व हामीले निर्वाह गरिरहेका र्छौं । हाम्रा काम बुझ्नु भएको छैन वा चित्त बुझेको छैन भने आउनोस् हामी कुरा बुझाउँर्छाैं । कुरा नबुझी बोलिदिनुभयो भने अन्यथा अर्थ लाग्छ । भ्रम सिर्जना हुन्छ । पहिले रानीपोखरीको सन्दर्भमा यस्तै भएको थियो । अहिले कमलपोखरीको बारेमा पनि यस्तै भइरहेको छ ।’ भित्री सहरी क्षेत्रको पहिचान भनेकै मूर्त अमूर्त र जीवन्त संस्कृति भएको बताउँदै मेयर शाक्यले, सम्पदाको संवेदनशीलता बुझेर प्रतिक्रिया दिन आग्रह गर्नुभयो ।
त्यस क्रममा बोल्दै वडाध्यक्ष मचाराजा महर्जनले, वडाभित्र माग भएर आएर कुनै पनि योजना नरोकिएको बताउनुभयो । ‘सम्पदा जोगाउन, सहरी सुविधा पुर्याउनु र विपद् प्रतिकार्यका काम गर्नु भित्री वडाका प्राथमिक काम हुन् ।’ वडाध्यक्ष महर्जनले, यस कामको परिणामका लागि वडाले प्रक्रियामा कतै पनि ढिलाइ नगरेको बताउनुभयो ।
कार्यक्रममा राजभाइ ज्यापूले महानगरबाट प्राप्त सहयोगले स्थानीयलाई खुशी दिएको प्रतिक्रिया दिनुभयो ।
आज सेतो मच्छिन्द्र नाथको महास्नान गर्ने दिन हो । यही पवित्र दिनमा त्वाः छेँ को शिलान्यास गरिएको हो ।
