काठमाडौं । नेपाली राष्ट्रिय क्रिकेट टीमका कप्तान रोहित कुमार पौडेलले विश्वकपका लागि छनोट गरिएको टोली बेस्ट रहेको बताएका छन् ।
बिहीबार वेस्ट इन्डिज एसँग हार बेहोरेपछि पत्रकारहरुसँग बोल्दै रोहितले अहिलेको अवस्थामा ‘बेस्ट १५’ छनोट भएको बताए । उनले भने, ‘अहिलेको सिनारियोमा यो बेस्ट १५ हो’ ।
नेपाल क्रिकेट संघ (क्यान) ले बुधबार मात्रै आगामी महिना हुने विश्वकपका लागि १५ सदस्यीय टोलीको घोषणा गरेको थियो ।
वेस्ट इन्डिज एसँग पहिलो खेल जितेको नेपालले लगातार ३ खेल गुमाएपछि ५ खेलको शृंखला हारेको छ । रोहितले आफूहरुले ठीक निर्णय लिन नसकेको र धैर्यतासाथ खेल्न नसकेको कारण सिरीज गुमाउन परेको बताए । पावर प्लेमा अपेक्षित प्रदर्शन गर्न नसक्दा टोली दबाबमा परेको उनको भनाइ छ ।
आजको खेलमा कप्तान रोहित एक्लैले ८२ रन बनाए । उनले अघिल्ला दुई खेलमा पनि शतक र अर्धशतक बनाएका थिए ।
