![](https://newspolar.com/wp-content/uploads/2024/05/anuj-thapan.avif)
एजेन्सी । सलमान खानको घरमा गोली चलाउनेहरूलाई हतियार उपलब्ध गराएको आरोप लागेका अनुज थापानले मुम्बई प्रहरीको हिरासतमा आत्महत्या गरेका छन् ।
उनले तन्ना (चादर) को सहायताले आत्महत्या गरेका हुन् । निकै गम्भीर अवस्थामा अनुजलाई अस्पताल लगिएको थियो, जहाँ चिकित्सकले उनलाई मृत घोषणा गरेका थिए ।
मुम्बई क्राइम ब्रान्चले गोलीबारीमा संलग्न अनुज (३२) र सुभाष चन्द्र (३७)लाई पञ्जाबबाट अप्रिल २५ मा पक्राउ गरेको थियो । दुवैले यो घटनाका लागि हतियार उपलब्ध गराएको थियो ।
दुवै आरोपी पञ्जाबको अबोहरका बासिन्दा हुन् । आत्महत्या गरेका अनुज गाउँकै ट्रकमा हेल्परको काम गर्थे ।
दोस्रो अभियुक्त सुभाष किसान हुन् । दुवै आरोपीविरुद्ध पञ्जाब र हरियाणामा धेरै मुद्दा दर्ता छन् । दुवैले धेरै वर्षदेखि लरेन्स बिश्नोईसँग काम गरिरहेका थिए ।
अनुज र सुभाषले अप्रिल १५ मा पनवेलका सागर पाल र विक्की गुप्ता नामका केटालाई दुईवटा पेस्तोल दिएका थिए । यही पेस्तोलको सहयोगमा विक्की र सागरले सलमान खानको घर ग्यालेक्सी अपार्टमेन्टमा गोली प्रहार गरेका थिए ।
विक्की र सागर गुजरातको भुजबाट पक्राउ परेका थिए भने अनुज र सुभाषलाई पञ्जाबबाट पक्राउ गरिएको थियो ।
सलमान खानको घरमा भएको गोलीकाण्डमा दोषीमाथि मकोकाको धारा लगाइएको छ । यसबाहेक मुख्य षड्यन्त्रकारी अनमोल बिश्वोई र लरेन्स बिश्नोईमाथि पनि मकोका लगाइएको छ ।
कुल ६ अभियुक्तलाई मकोका लगाइएको छ । मकोका लागु भएपछि अभियुक्तले छिट्टै धरौटी पाउन सक्ने छैनन् । मकोका अन्तर्गत न्यूनतम सजाय ५ वर्ष जेल रहेको छ ।