काठमाडौँ । आईपीएल–२०२४ को ४८ औँ खेलमा लखनउ सुपर जायन्ट्सले मुम्बई इन्डियन्सलाई ४ विकेटले पराजित गरेको छ । चालू सिजनमा यी दुईबीच पहिलो पटक खेल भएको हो ।
एलएसजीको यो सिजनको छैटौं जित हो । टोली १२ अंकसहित अंक तालिकाको तेस्रो स्थानमा छ । अर्कोतर्फ एमआईले लगातार तेस्रो खेलमा हार बेहोरेको छ ।
लखनउको भारत रत्न श्री अटल बिहारी वाजपेयी स्टेडियममा भएको खेलमा एलएसजीले टस जितेर बलिङ रोजेको थियो । मुम्बईले २० ओभरमा ७ विकेट गुमाएर १४४ रन बनाएको थियो । जवाफमा लखनउले १९.२ ओभरमा ६ विकेट गुमाएर लक्ष्य पूरा गर्यो ।
मार्कस स्टोइनिसले ४५ बलमा ६२ रनको इनिङ खेले भने कप्तान केएल राहुलले २८ रनको योगदान दिए । मुम्बईका लागि कप्तान हार्दिक पाण्ड्याले २ विकेट लिए । खेलको प्लेयर अफ द म्याच पनि स्टोइनिस भए ।
एमआईका लागि नेहल वढेराले ४६, टिम डेभिडले ३५ र इशान किशनले ३२ रन बनाए । लखनउका मोहसिन खानले २ विकेट लिए । मयंक यादव, नवीन उल हक, रवि बिश्नोई र मार्कस स्टोइनिसले एक–एक विकेट लिए ।
