काठमाडौं । राष्ट्रिय मानव अधिकार आयोगले सुनसरीको देवानगञ्जमा दुई समुदायबीच भएको झडप र प्रहरीको गोली लागेर ओमप्रकाश मेहताको मृत्यु भएको घटनाको मानव अधिकारको दृष्टिकोणबाट अनुसन्धान सुरु गरेको जनाएको छ ।
आयोगको कोशी प्रदेश कार्यालय विराटनगरले घटनाबारे प्रारम्भिक अनुगमन गरिरहेको छ । आयोगले प्रमुख जिल्ला अधिकारी, सुनसरीका प्रहरी प्रमुख, अस्पताल प्रशासन तथा स्थानीयसँग घटनाका विषयमा जानकारी लिइरहेको जनाएको छ ।
आयोगका अनुसार पोलमा झण्डा राख्ने विषयमा दुई समुदायबीच विवाद भएको र डिजे बजाउने क्रममा विवाद उत्कर्षमा पुगेको थियो । विवाद बढ्दै जाँदा दुई पक्षबीच तोडफोड र झडप भएको तथा स्थिति नियन्त्रणमा लिने क्रममा प्रहरीले गोली चलाउँदा ओमप्रकाश मेहताको मृत्यु भएको प्रारम्भिक अनुगमनबाट खुलेको छ ।
घटनामा ९ जना घाइते भएका छन् । घाइतेमध्ये दुई जनाको अवस्था गम्भीर रहेको आयोगले जनाएको छ । घाइतेमध्ये चार जनाको न्युरो अस्पताल, चार जनाको विराट नर्सिङ होम र एक जनाको नोबेल मेडिकल कलेजमा उपचार भइरहेको आयोगलाई जानकारी प्राप्त भएको छ ।
घटनापछि विरोधमा विभिन्न स्थानमा टायर बालिएको तथा प्रदर्शनकारीले लाठी, रडलगायतका सामग्री बोकेर प्रदर्शन गरेको आयोगले जनाएको छ । कप्तानगञ्जलगायतका क्षेत्रमा अवस्था तनावग्रस्त रहेको र सुरक्षा स्थिति नियन्त्रणमा लिन कप्तानगञ्जमा सेना परिचालन गरिएको जानकारी प्राप्त भएको आयोगले जनाएको छ ।
आयोगले सुनसरीमा कमजोर बनेको शान्तिसुरक्षाको अवस्था तत्काल मजबुत बनाउन, घटनाको निष्पक्ष अनुसन्धान गरी दोषीलाई कानुनी कारबाहीको दायरामा ल्याउन सरकारलाई आग्रह गरेको छ । साथै, मृतकका परिवारलाई राहत तथा क्षतिपूर्ति उपलब्ध गराउन र घाइतेको निःशुल्क तथा प्रभावकारी उपचारको व्यवस्था गर्न पनि आयोगले सरकारलाई निर्देशन दिएको छ ।
आयोगले राजनीतिक दल, नागरिक समाज, मानव अधिकारकर्मी तथा सर्वसाधारणलाई शान्तिपूर्ण वार्ता र संवादमार्फत विवादको समाधान खोज्दै सामाजिक सद्भाव कायम राख्न सहयोग गर्न अपिल गरेको छ ।
