एजेन्सी । भारतीय क्रिकेट कन्ट्रोल बोर्ड (बीसीसीआई) सचिव जय शाह र मुख्य चयनकर्ता अजित आगरकर टी–२० विश्वकप २०२४ छनोटका लागि अहमदाबाद पुगेका छन् ।
पीटीआईका अनुसार छनोटका लागि बैठक सुरु भएको छ । प्रतियोगिताका लागि भारतीय टोलीको घोषणा आज हुने सम्भावना अधिक छ । आईसीसीले विश्वकपका लागि टोली घोषणा गर्ने अन्तिम मिति मे १ सम्मलाई दिएको छ ।
सन् २०२४ को टी–२० विश्वकप अमेरिका र वेस्ट इन्डिजमा जुन २ देखि २९ सम्म खेलाइनेछ । भारतीय टोलीले ५ जुनमा आयरल्याण्डसँगको खेलबाट विश्वकपको सुरुवात गर्नेछ ।
टी–२० विश्वकपको यो ९औँ संस्करण हो । डिफेन्डिङ च्याम्पियन इंग्ल्याण्ड हो, यो टोलीले २०२२ मा पाकिस्तानलाई हराएर दोस्रो पटक उपाधि जितेको थियो । यसअघि सन् २०१० मा अष्ट्रेलियालाई हराउँदै टोलीले पहिलो पटक उपाधि जितेको थियो । वेस्ट इन्डिजले पनि २०१२ र २०१६ मा दुई पटक उपाधि जितेको छ । भारत, पाकिस्तान, अस्ट्रेलिया र श्रीलंकाले एक–एक पटक उपाधि जितेका छन् ।
