काठमाडौं । प्रधानमन्त्री केपी शर्मा ओलीले आफु माउन्ट केटु जान पाएको भए फर्केर नआउने बताएका छन् । मंगलबार पाकिस्तानको माउन्ट केटु हिउँदे सिजनमा आरोहण गरी कीर्तिमान कायम गरी फर्केका नेपाली आरोहीहरुलाई सम्मान गर्दै प्रधानमन्त्री ओलीले आरोहण जोखिमपूर्ण हुने भन्दै सहज भएको भए आफू पनि आरोहणमा जान सक्ने बताएका हुन्।
प्रधानमन्त्री ओलीले आरोहीहरुलाई सम्मान गर्दै ठट्यौली शैलीमा माउन्ट केटु आरोहणमा आफू पनि जान पाएको भए अझ बढी धुमधाम हुने बताएका हुन् । ‘आरोहण मुस्किल छ, कठिन छ, सजिलो भएको भए त प्रधानमन्त्री पनि यो टिममा हुन्थ्यो,’ उनले भने, ‘अझ बढी धुमधाम हुन्थ्यो ।’ त्यो दुस्साहस आफूले गरेको भए फर्केर नआउने ठट्टासमेत प्रधानमन्त्रीले गरे ।
माउन्ट केटु आरोहण गरी फर्केको टिमलाई सम्मान गर्दै अवार्ड दिने घोषणासमेत गरे । उनले आरोहीबाट सबैले प्रेरणा लिन सक्ने भन्दै टिमका सदस्यलाई बधाई ज्ञापन गरे । आरोहणको क्रममा अत्यन्त सावधानी अपनाउन सुझाव दिँदै उनले अनुभवलाई हल्का रुपमा नलिन समेत आग्रह गरे ।
