काठमाडौं । कतारका राजालाई स्वागत गर्न सरकारले दिएको सार्वजनिक विदाबारे गृहमन्त्री रवि लामिछानेले प्रष्टीकरण दिएका छन् ।

कतारका अमिर शेख तमिम बिन हमाद अल थानीको स्वागतमा सार्वजनिक विदाको औचित्यमा प्रश्न उठाएपछि लामिछानेले सामाजिक सञ्जालबाटै प्रतिक्रिया जनाएका हुन् । उनले कुनै व्यक्ति, देश वा घटना हेरेर फरक–फरक निर्णय गर्नु कुटनीतिक, राजनीतिक र वैधानिक हिसाबले सही नहुने बताए ।

गृहमन्त्री लामिछानेले अनावश्यक विदा, भीआइपी सवारी नामको नागरिकले पाउने सास्ति लगायतका थुप्रै विषयमा पदबहाल गरेको दिनदेखि नै आफूले लगातार काम गरिरहेको बताए । उनले भनेका छन्, ‘जे कुरा हिजो गलत भनिएको थियो, त्यो आज पनि गलत नै हो । हिजोका अभिव्यक्तिहरुको गोताखोरी गर्नै पर्दैन । तर तीन दशकदेखिका अभ्यासहरु सच्याउन समय त लाग्छ । धेरै काम हुँदैछन् । थोरै धैर्य गरिदिनुभए पुग्छ ।’

लामिछानेले विश्व अर्थराजनीतिमा नयाँ मानक स्थापित गर्दै रहेको, नेपालका लाखौ युवाहरूलाई रोजगारीको अवसर दिइरहेको र नेपालसँग ऐतिहासिक कुटनैतिक सम्बन्ध स्थापित भएको मित्र राष्ट्र कतारका राजालाई नेपालमा ससम्मान स्वागत गर्ने बताए।

https://www.facebook.com/rabi.nikitalamichhane/posts/3624787717733374?ref=embed_post