काठमाडौं । प्रधानमन्त्री पुष्पकमल दाहाल र नेकपा एकीकृत समाजवादीका नेता झलनाथ खनालबीच आज भेटवार्ता भएको छ ।
प्रधानमन्त्री दाहालले बालुवाटारमै बोलाएर खनालसँग छलफल गरेका हुन् । सुदूरपश्चिम प्रदेश सरकार गठनमा समाजवादीले नेपाली कांग्रेसलाई साथ दिएपछि सत्ता गठबन्धनभित्र विवाद छ ।
एकीकृत समाजवादीले सुदूरपश्चिम प्रदेशबाट विद्रोह गरेपछि वर्तमान सत्ता गठबन्धन धरापमा परेको छ । अध्यक्ष माधव नेपालले प्रधानमन्त्री दाहाल र नेकपा एमालेका अध्यक्ष केपी ओली सहमतिबाट पछि हटेकोले गठबन्धनबाट बाहिरिने चेतावनी दिँदै आएका छन् ।
यसै विषयमा प्रधानमन्त्री प्रचण्ड र सम्मानित नेता खनालबीच छलफल भएको बताइएको छ । एक प्रदेशमा मुख्यमन्त्री पाउनुपर्ने बताउँदै आएको समाजवादीले सुदूरपश्चिम प्रदेशमा कांग्रेस र नागरिक उन्मुक्ति पार्टीको पक्षमा उभिएपछि सो प्रदेशमा नाउपाकै दुई सांसदले मुख्यमन्त्रीमा दाबी गरेका छन् ।
प्रधानमन्त्री दाहालले नेता खनाललाई गठबन्धनबाट नबाहिरिन आग्रह गरेका छन् । उनले सुदूरपश्चिम प्रदेश सरकार गठन पनि अहिलेकै गठबन्धनबाट बनाउनुपर्ने भएकाले विपक्षी कांग्रेससँग नमिसिने आग्रह गरेका छन् ।
त्यसो त नेता खनाल सुदूरपश्चिम प्रदेश सरकार गठनमा कांग्रेसलाई साथ दिने पार्टी अध्यक्ष माधवकुमार नेपालको निर्णयप्रतिसमेत असन्तुष्ट छन् । उनले अहिलेकै गठबन्धनलाई बलियो बनाउनुपर्ने र आफ्नो पार्टीका केही माग भने सम्बोधन गर्नुपर्ने बताएका छन् ।
जवाफमा प्रधानमन्त्री दाहालले सबै विषय सहमतिबाटै गरिने भएकाले हतार नगर्न नेता खनाललाई आग्रह गरेको बताइएको छ ।
गठबन्धनप्रति नेता नेपालले तीव्र असन्तुष्टि जनाएपछि प्रधानमन्त्री दाहाल र एमाले अध्यक्ष केपी शर्मा ओलीले झलनाथ खनालको अस्त्र प्रयोग गर्न खोजेको विश्लेषण हुँदै आएको छ ।
