एजेन्सी । आइतबार (अप्रिल १४) बिहान मुम्बईको बान्द्रा वेस्टमा रहेको सलमान खानको ग्यालेक्सी अपार्टमेन्टमा गोली चलेको थियो । यस घटनामा प्रहरीले गोली चलाउने र गराउने व्यक्तिको बारेमा ठोस जानकारी पाएको छ ।
गोली प्रहारको जिम्मेवारी लरेन्स ग्याङका अनमोल बिश्नोई, गोल्डी बरार र रोहित गोदाराले लिएका छन् । सोही क्रममा सलमानको घर बाहिर गोली चलाउने व्यक्ति विशाल उर्फ कालु रोहित गोदारा गिरोहका हुन् ।
सलमानको घर बाहिर गोली चलाउने दुई आक्रमणकारीको तस्विर सार्वजनिक भएको छ । एक आक्रमणकारी कालो र सेतो टी(सर्टमा देखिन्छन्, जबकि अर्को रातो टी(सर्टमा । यससँगै २९ फेब्रुअरी २०२४ को सीसीटीभी फुटेज पनि फेला परेको छ, जुन हरियाणाको रोहतकमा रहेको ढाबाको हो ।
मुम्बईमा सलमानको घर अगाडि भेटिएको सीसीटीभी फुटेजमा देखिएका व्यक्तिको अनुहारसँग यो शूटर कालुको अनुहार मिल्छ । सलमान खानको घर बाहिर कालु उर्फ विशाल राहुलले गोली चलाएको आशंका छ ।
यसअघि आइतबार एक फेसबुक पोस्टमा अमेरिकामा लुकेर बसेका ग्याङ्गस्टर अनमोल बिश्नोईले पुरानो दुश्मनीका कारण सलमान खानको घरमा गोली चलाएको लरेन्स बिश्नोई गिरोहले गरेको स्वीकार गरेका थिए ।
को हुन् विशाल राहुल उर्फ कालु ?
कालु राजस्थानका कुख्यात ग्याङ्स्टर रोहित गोदाराका विशेष शूटर हुन् । रोहित गोदरा लरेन्स गिरोहसँग सम्बन्धित छन् ।
कालुले हालै रोहतकका स्क्र्याप व्यवसायी सचिन गोडाको हत्या गरेका थिए, जसको सीसीटीभी फुटेज र हत्याको जिम्मेवारी लिने पोस्ट पनि सोशल मिडियामा जारी गरिएको थियो ।
गुरुग्राम निवासी कालुले १० कक्षासम्म पढेका छन् । उनी विरुद्ध गोली हानाहान, मोटरसाइकल चोरी लगायतका कैयौं आपराधिक मुद्दा दर्ता छन् ।
