काठमाडौँ । ओमानमा जारी एसिसी मेन्स प्रिमियर कपको आफ्नो दोस्रो खेलमा पनि नेपालले जित निकालेको छ । भर्खरै सम्पन्न खेलमा नेपालले कतारलाई ३२ रनले हराएको हो । नेपालले दिएको २११ रनको लक्ष्य पछ्याएको कतारले २० ओभरमा ९ विकेटको क्षतिमा १७८ रनमात्रै बनाउन सक्यो ।
उसका लागि मुहम्मद तनविरले ३३ बलमा ६३ रन जोडे । यस्तै, कमरान खानले १८, मोहम्मद अहनाफले २३, हिमान्सु राठोरले २२ (नटआउट) अदनान मिर्जाले १९ रन जोडे ।
बलिङतर्फ नेपालका ललित राजवंशी, दिपेन्द्र सिंह ऐरी र गुलशन झाले २-२ विकेट लिए भने कुशल मल्ल र अभिनाश बोहराले १-१ सफलता हात पारे ।
त्यसअघि टस जितेर पहिले ब्याटिङ गरेको नेपालले २० ओभरमा ७ विकेट गुमाएर २१० रन जोड्यो । नेपालका लागि दिपेन्द्र सिंह ऐरी र आसिफ शेखले अर्धशतकीय पारी खेले । मात्र २१ बलमा दिपेन्द्र ६४ रनसहित अविजित रहे ।
उनले अन्तिम ओभरमा सबै बलमा छक्का हाने । अर्थात् उनले ६ बलमा ६ छक्का प्रहार गरे । आफ्नो पारीमा उनले ७ छक्का र ३ चौका हिर्काए ।
आसिफले ४१ बलमा ५२ रनको योगदान दिए । उनले ६ चौका हाने । यस्तै, कुशल मल्लले १८ बलमा ३५ रनको योगदान दिए ।
रोहित पौडेलले १८ तथा कुशल भुर्तेलले १२ रन जोडे । कतारका लागि हिमान्सु राठोर र मुसवार शाहले ३/३ तथा आमिर फारुकले १ विकेट लिए ।
नेपालले हिजो भएको खेलमा मलेसियालाई ५ विकेटले पराजित गरेको थियो ।
