काठमाडौं । इंडियन प्रिमियर लिग (आईपीएल) मा बिहीबार भएको खेलमा मुम्बई इंडियन्सले रोयल च्यालेन्जर्स बैंगलोर (आरसिबि) विरुद्ध सानदार जित दर्ता गरेको छ ।
जारी सिजनमा दोस्रो जित दर्ता गर्ने क्रममा मुम्बईले आरसिबि माथि ७ विकेटको जित दर्ता गरेको हो । आरसिबिले दिएको १९७ रनको विशाल लक्ष्य मुम्बईले मात्र १५.३ ओभरमा ३ विकेट गुमाएर भेट्टायो ।
मुम्बईका लागि ओपनर इशान किशनले ३४ बलमा ७ चौका र ५ छक्का सहित सर्वाधिक ६९ रन बनाए । यस्तै सूर्यकुमार यादवले १९ बलमा ५ चौका र ४ छक्का सहित ५२ रनको विष्फोटक इनिङ खेले ।
रोहित शर्माले २४ बलमा ३८ रन बनाए भने कप्तान हार्दिक पन्ड्याले ६ बलमा २१ रन जोडे । आरसिबिका लागि आकाश दिप, विजयकुमार विशाक र विल ज्याक्सले समान १-१ विकेट लिए ।
त्यसअघि टस हारेर पहिले ब्याटिङ गरेको आरसिबिले निर्धारित २० ओभरमा ८ विकेट गुमाउँदै १९६ रनको विशाल योगफल जोडेको थियो ।
आरसिबिका लागि कप्तान फ्याफ डु प्लेसिसले सर्वाधिक ६१ रन बनाए भने दिनेश कार्तिकले २३ बलमा ५ चौका र ४ छक्का सहित ५३ रन जोडे । रजत पाटिदारले २६ बलमा ५१ रन बनाए ।
मुम्बईका जासप्रीत बुमराह एक्लैले ५ विकेट लिएका थिए भने जेराल्ड कोट्जी, आकाश मध्वाल र श्रेयास गोपालले १-१ विकेट लिएका थिए ।
यो जितसङै मुम्बई ५ खेलमा ४ अंकसहित सातौं स्थानमा छ । आरसिबि भने ६ खेलमा २ अंक सहित नवौं स्थानमा छ ।
आईपिएलमा आज लखनऊ सुपर जाएन्ट्स र दिल्ली क्यापिटल्सबीच प्रतिस्पर्धा हुँदैछ ।
