एजेन्सी । राजस्थान रोयल्स (आरआर)का कप्तान सञ्जु सामसनलाई १२ लाख रुपैयाँ जरिवाना गरिएको छ । बुधबार जयपुरमा गुजरात टाइटन्स (जीटी) विरुद्धको खेलमा स्लो ओभर रेटका कारण सञ्जुलाई जरिवाना गरिएको हो । इन्डियन प्रिमियर लिग (आईपीएल)ले बिहिबार यो जानकारी दिएको हो ।
आईपीएलको १७ औं सिजनमा राजस्थान रोयल्सले बुधबार यो सिजनको पहिलो हार बेहोरेको थियो । टस हारेर पहिले ब्याटिङ गरेको राजस्थानले २० ओभरमा ३ विकेट गुमाएर १९६ रन बनाएको थियो । जवाफमा गुजरातले २० ओभरमा ७ विकेट गुमाएर १९७ रनको लक्ष्य पुरा गरेको थियो ।
१९ औं ओभरमा गुजरातलाई जितका लागि १५ रन आवश्यक थियो। राजस्थानको टोली निर्धारित समयमा ओभर सकिन ५ मिनेट पछाडि परेको थियो । जसका कारण अन्तिम ओभरमा सञ्जुले ५ को सट्टा ४ जना मात्र खेलाडीलाई बाउन्ड्रीमा पठाउनु परेको थियो। जीटीका रसिद खानले ३ चौका प्रहार गर्दै टोलीलाई जित दिलाएका थिए ।
यस सिजन राजस्थानको टोलीको यो पहिलो गल्ती भएकोले आईपीएलको आचार संहिता अनुसार न्यूनतम सजाय तोकिएको आईपीएल अधिकारीहरुले बताएका छन् ।
यसअघि गुजरात टाइटन्सका कप्तान शुभमन गिल र दिल्ली क्यापिटल्सका कप्तान ऋषभ पन्तलाई पनि जरिवाना गरिएको थियो ।
