काठमाडौँ । क्रिस्टियानो रोनाल्डो आवद्ध अल नासरले साउदी सुपर कपमा हार बेहोरेको छ । दुबईको मोहम्मद बिन जायद स्टेडियममा भएको सेमिफाइनल खेलमा अल हिलालसँग नासर २–१ गोलले स्तब्ध बनेको हो ।
खेलको ६१ औं मिनेटमा सलिम अलदावारसीले गोल गर्दै अल हिलाललाई सुरुवाती अग्रता दिलाएका थिए । ७२ औं मिनेटमा माल्कोमले गोल थप्दै हिलालको अग्रता दोब्बर पारे ।
खेल सकिनै लाग्दा इन्जुरी समयमा ९०+९ औं मिनेटमा साडियो मानेले गोल गरेपनि अल नासरको हार टार्न सकेनन् । खेलको ८६ औं मिनेटमा रोनाल्डोले रातो कार्ड खाँदै मैदानबाट बाहिरिए ।
बल मैदानबाट बाहिँर जाँदा थ्रो गर्ने क्रममा उनले अल हिलालका अलि अलबुलायहीलाई धक्का प्रहार गरेका थिए । रोनाल्डोले त्यसरी हातले धक्का हान्दै ठेलेपछि खेलमा तनाव समेत उत्पन्न भएको थियो । त्यसपछि रेफ्रिले रोनाल्डोलाई रातो कार्ड देखाए ।
विजयी अल हिलालले फाइनलमा अल इतिहाडको सामना गर्नेछ । फाइनल खेल बिहीबार हुनेछ ।
