काठमाडौँ । इन्डियन प्रिमियर लिग–२०२४ (आईपीएल) मा मुम्बई इन्डियन्स (एमआई)ले पहिलो जित हात पारेको छ ।
टोलीले चालु सिजनको २० औं खेलमा दिल्ली क्यापिटल्स (डीसी) लाई २९ रनले पराजित गरेको हो ।
आइतबार वानखेडे रंगशालामा भएको डबल हेडरको पहिलो खेलमा दिल्लीले टस जितेर बलिङ रोजेको थियो । टस हारेर पहिले ब्याटिङ गरेको मुम्बईले २० ओभरमा ५ विकेट गुमाएर २३४ रन बनाएको थियो ।
जवाफमा दिल्लीले २० ओभरमा ८ विकेट गुमाएर २०५ रन मात्रै बनाउन सक्यो ।
मुम्बईको इनिङ्सको अन्तिम ओभरमा ३२ रन बन्यो । रोमारियो शेफर्डले एनरिके नोर्ट्याका सबै ६ बलमा बाउन्ड्री प्रहार गरे । जसमा ४ छक्का र २ चौका थिए ।
शेफर्डले १० बलमा ३९ रन बनाए भने टिम डेभिडले २१ बलमा ४५ रन बनाए । दुवैले ५३ रनको अविजित साझेदारी गरे । रोहित शर्माले ४९ र इशान किशनले ४२ रन बनाए । कप्तान हार्दिक पाण्ड्याले ३३ बलमा ३९ रन बनाए । अक्षर पटेलले दुई विकेट लिए ।
२३५ रनको विशाल लक्ष्य पछ्याएको दिल्लीको टोलीले २० ओभरमा आठ विकेट गुमाएर २०५ रन मात्रै बनाउन सकेको थियो । १९ औं ओभरसम्म दिल्लीले २०१ रन बनाएको थियो भने मुम्बईले २०२ रन बनाएको थियो । शेफर्डको ३२ रन निर्णायक साबित भयो ।
पाँच खेलमा चौथो हारसँगै दिल्लीको टोली अंक तालिकाको पुछारको १० औं स्थानमा झरेको छ । योसँगै लगातार तीन खेल हारेर पहिलो जित दर्ता गर्दै मुम्बईको टोली आठौं स्थानमा पुगेको छ । दिल्लीको अर्को खेल अप्रिल १२ मा लखनऊ सुपर जायन्ट्ससँग एकनामा हुनेछ । त्यस्तै, मुम्बईको टोलीले अप्रिल ११ मा वानखेडेमा रोयल च्यालेन्जर्स बैंग्लोरको सामना गर्नेछ ।
