एजेन्सी । इन्डियन प्रिमियर लिग–२०२४ को आठौं खेलमा आज सनराइजर्स हैदरावाद (एसआरएच) ले पाँच पटकको च्याम्पियन मुम्बई इन्डियन्स (एमआई) को सामना गर्दैछ ।
खेल बेलुका ७ः४५ बजेदेखि हैदरावादको घरेलु मैदान राजीव गान्धी अन्तर्राष्ट्रिय रंगशालामा हुनेछ ।
जारी सिजनमा दुवै टोलीको यो दोस्रो खेल हुनेछ । दुवैले ओपनिङ खेलमा हार बेहोरेका थिए । हैदराबाद कोलकाता नाइट राइडर्स र मुम्बई गुजरात टाइटन्ससँग पराजित भएको थियो ।
आर्र्इपीएलमा हैदरावाद र मुम्बईबीच हालसम्म २१ खेल खेलिएका छन् । हैदरावादले ९ र मुम्बईले १२ खेल जितेका छन् । हैदरावादको राजीव गान्धी अन्तर्राष्ट्रिय रंगशालामा दुवै टोलीको कीर्तिमान बराबर छ । यहाँ एसआरएच र एमआईबीच हालसम्म ८ वटा खेल भएका छन् । हैदरावादले ४ र मुम्बईले त्यति नै खेल जितेको छ ।
हैदरावाद क्रिकेट स्टेडियम आफ्नो समतल विकेटका लागि परिचित छ । यहाँको पिच ब्याटिङमैत्री छ । यहाँ उच्च स्कोरिङ खेलहरू देखिएका छन् । बलरहरूलाई पनि यहाँ मद्दत मिल्छ ।
यस रंगशालामा हालसम्म ७१ आईपीएल खेल भइसकेका छन्, जसमध्ये ३१ खेल पहिलो इनिङ्समा ब्याटिङ गरेको टोलीले जितेको छ भने ४० खेल चेज गरेको टोलीले जितेको छ ।
आज हैदरावादको मौसम धेरै तातो हुनेछ । यहाँको तापक्रम २४ देखि ३८ डिग्री सेल्सियस रहने अनुमान गरिएको छ । पानी पर्ने सम्भावना कत्ति पनि छैन ।
