काठमाडौँ । पोल्याण्ड आगामी जुनमा जर्मनीमा हुने युरो कपका लागि छनोट भएको छ । गएराति भएको प्लेअफ फाइनल खेलमा वेल्सलाई पेनाल्टीमा ५–४ गोलले पराजित गर्दै पोल्याण्डले युरो कपको टिकट काटेको हो ।
जितसँगै पोल्याण्ड युरो कपमा छनोट हुने अन्तिम राष्ट्र बन्यो । वेल्सको कार्डिफ सिटी स्टेडियममा भएको खेलमा दुबै टोलीबाट निर्धारित ९० तथा अतिरिक्त समयसम्म पनि गोल हुन नसक्दा खेल पेनाल्टी सुटआउटमा गएको थियो ।
पोल्याण्डले प्रतियोगितामा लगातार पाँचौं पटक स्थान सुरक्षित गरेको छ । योसँगै पोल्याण्ड फ्रान्स, नेदरल्याण्ड्स र अस्ट्रियासँग समूह डी मा रहनेछ ।
‘यो सजिलो थिएन किनभने हामीलाई घरेलु मैदानमा वेल्स खतरनाक छ भन्ने थाहा थियो । हाम्रो लागि सबैभन्दा महत्त्वपूर्ण कुरा हाम्रो आफ्नै खेल खेल्नु थियो र हामीले त्यही गरेका छौँ ।’ पोल्याण्डका म्यानेजर माइकल प्रोबियर्सले भने ।
