एजेन्सी । पाकिस्तानका देब्रे हातका मध्यम गतिका बलर मोहम्मद आमिरले टी–२० विश्वकपका लागि सन्यास फिर्ता लिँदै टोलीमा फर्किएका छन् ।
आमिरले जुन १ देखि अमेरिका र वेस्ट इन्डिजमा सुरु हुने टी–२० विश्वकपका लागि आफूलाई उपलब्ध भएको घोषणा गरेका छन् ।
ट्विट गर्दै आमिरले आफूलाई पाकिस्तान क्रिकेट टोलीका लागि उपलब्ध भएको घोषणा गरेका हुन् । आमिरले २०१९ मा टेस्ट क्रिकेटबाट र डिसेम्बर २०२० मा सेतो बल क्रिकेटबाट सन्यासको घोषणा गरेका थिए ।
अर्कोतर्फ पाकिस्तानका स्पिन अलराउन्डर इमाद वासिम पनि दुई दिनअघि अर्थात मार्च २३ मा सन्यास फिर्ता लिएर फर्किएका छन् । ३५ वर्षीय खेलाडीले नोभेम्बर २०२३ मा सन्यास लिएका थिए ।
आमिरले पाकिस्तानका लागि ५० टी–२० अन्तर्राष्ट्रिय खेलमा ५९ विकेट लिएका छन् । जहाँ उनको उत्कृष्ट प्रदर्शन १३ रनमा ४ विकेट थियो । यसबाहेक उनले ३६ टेष्ट खेलमा ११९ विकेट लिएका छन् भने ६१ एकदिवसीय खेलमा ८१ विकेट लिएका छन् ।
