एजेन्सी । इन्डियन प्रिमियर लिग–२०२४ मा कोलकाता नाइट राइडर्सले विजयी सुरुवात गरेको छ । टोलीले सिजनको तेस्रो खेलमा सनराइजर्स हैदराबादमाथि ४ रनको रोमाञ्चक जित दर्ता गरेको हो ।
यो जितका नायक अलराउन्डर आन्द्रे रसेल बने । उनले २५ बलमा अविजित ६४ रनको विस्फोटक इनिङ खेले । यस्तै दुई विकेट पनि लिए ।
शनिबार इडेन गार्डेन रंगशालामा २०९ रनको लक्ष्य पछ्याउन आएको हैदराबादले २० ओभरमा ७ विकेट गुमाएर २०४ रन मात्रै बनाउन सक्यो । हेनरिक क्लासेनले २९ बलमा ८ छक्का प्रहार गर्दै ६३ रनको आक्रामक पारी खेले पनि आफ्नो टोलीलाई जित दिलाउन सकेनन् ।
उनी बाहेक ओपनर अभिषेक शर्मा र मयांक अग्रवालले ३२/३२ रनको योगदान दिए । हर्षित राणाले ३ विकेट लिए ।
कोलकाताको इनिङ्समा ओपनर फिल साल्टले ५४ रन बनाए । रमनदीप सिंहले ३५ र रिंकु सिंहले २३ रनको योगदान दिए । टी नटराजनले तीन विकेट लिए । खेलको प्लेयर अफ द म्याच रसेल घोषित भए ।
आजको खेलः
राजस्थान रोयल्स भर्सेस लखनउ सुपरजायन्ट्स – ३ः४५ बजे
गुजरात टाइटन्स भर्सेस मुम्बई इन्डियन्स – ७ः४५ बजे
