एजेन्सी । इस्लामाबाद युनाइटेडका अनुभवी अलराउन्डर इमाद वासिमले सोमबार पाकिस्तान सुपर लिगको फाइनलमा इतिहास रचेका छन् । पाकिस्तान सुपर लिग २०२४ को फाइनल खेल इस्लामाबाद युनाइटेड र मुल्तान सुल्तान्सबीच कराँचीको नेशनल स्टेडियममा भएको थियो ।
मुल्तान सुल्तानले टस जितेर पहिले ब्याटिङ गर्ने निर्णय गरेपनि बायाँ हाते स्पिनर इमाद वासिमले चाँडै नै सो निर्णय गलत साबित गरे । इनिङ्सको दोस्रो ओभरमा वासिमले यासिर खान र डेभिड विलीलाई आफ्नो शिकार बनाए ।
यसपछि उनले खुशदिल शाह, क्रिस जोर्डन र अब्बास अफ्रिदीलाई आउट गर्दै आफ्नो पाँच विकेट पूरा गरे ।
इमाद वासिम पाकिस्तान सुपर लिगको फाइनलमा एक इनिङमा ५ विकेट लिने पहिलो क्रिकेटर बनेका छन् । पाकिस्तान सुपर लिगको ९ औं संस्करण सकिएको छ र इमाद बाहेक अन्य कुनै बलरले यो उपलब्धि हासिल गर्न सकेका छैनन् । इमाद वासिमअघि पीएसएल फाइनलमा उत्कृष्ट बलिङ गर्ने कीर्तिमान शाहीन अफ्रिदीको नाममा थियो ।
शाहिन अफ्रिदीले २०२३ को पीएसएल फाइनलमा मुल्तान सुल्तान्सविरुद्ध ५१ रन दिएर चार विकेट लिएका थिए । यी दुई बलरबाहेक फाइनलमा कुनै पनि बलरले क्रमशः पाँच वा चार विकेट लिन सकेनन् ।
इस्लामाबाद युनाइटेड च्याम्पियन बन्यो
पाकिस्तान सुपर लिग २०२४ को फाइनलमा सोमबार अन्तिम बलमा मुल्तान सुल्तान्सलाई दुई विकेटले पराजित गर्दै इस्लामाबाद युनाइटेडले तेस्रोपटक उपाधि जितेको छ । पहिले ब्याटिङ गरेको मुल्तान सुल्तान्सले २० ओभरमा ९ विकेट गुमाएर १५९ रन बनाएको थियो । जवाफमा युनाइटेडले ८ विकेट गुमाएर लक्ष्य पुरा गर्यो । खेलको प्लेयर अफ द म्याच इमाद वासिम चुनिए ।
