एजेन्सी । रोयल च्यालेन्जर्स बैंगलोर (आरसीबी) फ्रेन्चाइजीले आइतबार पहिलो लिग उपाधि जितेर इतिहास रच्यो । सन् २००८ मा लिग क्रिकेट खेल्न थालेको आरसीबीले १६ वर्षपछि महिला टोलीसँग सफलता हात पारेको हो ।
वुमन्स प्रिमियर लिग (डब्लुपीएल) को फाइनलमा दिल्ली क्यापिटल्स (डीसी)लाई पराजित गर्दै आरसीबीले उपाधि जितेको हो ।
पुरुष टिमका पूर्व कप्तान विराट कोहलीले आरसीबीको जितमा महिला टिमकी कप्तान स्मृति मन्धानालाई बधाई दिएका छन् । फाइनल सकिएपछि उनले भिडियो कल गरेर मन्धनासहित सम्पूर्ण टिमलाई बधाई दिए ।
खेल सकिएपछि पत्रकार सम्मेलनमा मन्धनाले भनिन्, ‘भिडियो कलमा मैले विराटको शब्द राम्ररी सुन्न सकिनँ । रंगशालामा धेरै कोलाहल थियो तर उनको अनुहारमा खुशी थियो । यो देखेर मलाई राम्रो लाग्यो । पछिल्लो सिजन खराब भएपछि उनले सम्पूर्ण टोलीसँग कुरा गरे र हामीलाई विश्वास दिलाए । म बैंगलोर पुगेपछि पक्कै पनि उहाँसँग कुरा गर्नेछु ।’
