काठमाडौँ । म्यान्चेस्टर युनाइटेड एफए कपको सेमिफाइनलमा प्रवेश गरेको छ । गएराति भएको खेलमा लिभरपुलविरुद्ध ४–३ गोलको रोमाञ्चक जित निकाल्दै युनाइटेडले अन्तिम चारमा स्थान बनाएको हो ।
घरेलु मैदान वल्र्ड ट्राफोर्डमा खेलको १० औं मिनेटमा स्कट म्याकटोमीनेले गोल गर्दै युनाइटेडलाई सुरुवाती अग्रता दिलाएका थिए । ४४ औं मिनेटमा म्याक एलिस्टरले गोल गर्दै लिभरपुललाई १–१ गोलको बराबरीमा ल्याए ।
यस्तै, पहिलो हाफको इन्जुरी समयमा मोहमद सलाहले गोल गर्दै लिभरपुललाई २–१ गोलले अघि बढाए । ८७ औं मिनेटमा एन्टोनीले गोल गरेपछि युनाइटेड २–२ को बराबरीमा आयो । त्यसपछि निर्धारित ९० मिनेटसम्म २–२ गोलको बराबरी भएपछि खेल अतिरिक्त समयमा धकेलियो ।
१०५ औं मिनेटमा हार्भी इलिओटले गोल गर्दै लिभरपुललाई ३–२ ले अघि बढाए । तर, ११२ औं मिनेटमा मार्कुस रासफोर्डले गोल गर्दै युनाइटेडलाई ३–३ गोलको बराबरीमा ल्याए ।
यता, अन्तिम समयमा अर्थात् १२०+१ औं मिनेटमा अमद डियालोले गोल गर्दै युनाइटेडलाई रोमाञ्चक जित दिलाए । अब युनाइटेडले सेमिफाइनलमा कोभन्ट्रीसँग प्रतिस्पर्धा गर्नेछ ।
