एजेन्सी । रोयल च्यालेन्जर्स बैंगलोरका स्टार अलराउन्डर एलिस पेरीलाई टाटाले विशेष उपहार दिएको छ ।
शुक्रबार आरसीबी र मुम्बईको खेलपछि कम्पनीले महिला क्रिकेटरलाई फुटेको सिसा दिएको थियो । यो त्यही सिसा हो जुन एलिस पेरीले आफ्नो विस्फोटक शटले फुटाइन् ।
वास्तवमा, वुमन्स प्रिमियर लिगको ११ औं खेलमा अष्ट्रेलियाका यी खेलाडीले स्टेडियममा पार्क गरिएको कारको सिसा फुटाएर शक्तिशाली छक्का हानेकी थिइन्, जुन देखेर सबै अचम्मित भएका थिए ।
महिला प्रिमियर लिगको दोस्रो सिजनमा एलिस पेरीको प्रदर्शन उत्कृष्ट रहेको छ । एमआईविरुद्धको एलिमिनेटर खेलमा ३३ वर्षीय खेलाडीले विस्फोटक प्रदर्शन गरेकी थिइन् ।
उनले आरसीबीका लागि आठ चौका र एक छक्काको मद्दतले ६६ रन बनाएकी थिइन् भने एक विकेट समेत लिइन् । । यो बलियो प्रदर्शनका लागि उनी प्लेयर अफ द म्याच अवार्ड समेत प्राप्त गरिन् । दोस्रो सिजनमा ३१२ रन बनाएर यी स्टार खेलाडी ओरेन्ज क्यापको दौडमा शीर्ष स्थानमा छिन् ।
स्मृति मन्धानाको नेतृत्वमा रहेको टोलीले गएराति मुम्बई इन्डियन्सलाई ५ रनले पराजित गर्दै फाइनलमा प्रवेश गरेको थियो । अब टोलीले अरुण जेटली स्टेडियममा मार्च १७ मा दिल्ली क्यापिटल्सको सामना गर्नेछ । दुई टोलीबीच कडा प्रतिस्पर्धा हुनेछ । आरसीबी पहिलो पटक वुमन्स प्रिमियर लिगको फाइनलमा पुगेको छ र उसको नजर उपाधिमाथि छ ।
