काठमाडौँ । नेकपा (एमाले)का प्रमुख सचेतक महेश बर्तौलाले सुन तस्करी प्रकरणमा उच्चस्तरीय छानबिन आयोग गठनका लागि तत्कालीन समयमा एमालेले संसदमा दिएको दबाब र अवरोध सही सावित भएको बताएका छन् ।
छानबिन आयोगमार्फत तस्करीको अनुसन्धान गर्न तत्कालीन समय एमालेले उठाएको विषय अहिले आएर सही प्रमाणित भएको प्रतिक्रिया दिएका हुन् ।
प्रमुख सचेतक बर्तौलाले भने, ‘हामीले त्यसबेला राज्यको उच्च पदस्थ व्यक्तिको संलग्नताविना त्यति ठूलो अपराध हुनै सक्दैन भनेर आयोगको माग गरेका थियौं । हाम्रो मागमा त्यसबेला निकै विवाद र बहस सिर्जना भएको थियो, तर अहिले आएर आयोगले जे प्रतिवेदन दियो त्यसले एमालेको आशंका सही रहेछ भन्ने प्रमाणित गर्यो ।’
यस्तै, हिजो एमाले आयोग माग गर्ने ठाउँमा रहेको र अब त्यसलाई कार्यान्वयन गर्ने ठाउँमा आइपुगेको प्रमुख सचेतक बर्तौलाले बताए ।
सुन तस्करी सम्बन्धी छानबिन गर्न गठित आयोगले केन्द्रीय अनुसन्धान ब्यूरो (सीआईबी)ले सुन तस्करीको छानबिनमा गम्भीर त्रुटि गरेको निष्कर्ष निकालेको छ ।
