काठमाडौं । अन्तर्राष्ट्रिय क्रिकेट परिषद् (आईसीसी) ले सार्वजनिक गरेको टी-२० वरियतामा नेपालका कप्तान रोहित पौडेलले ब्याटिङतर्फ ६ स्थान सुधार गरेका छन् । उनी ब्याटिङतर्फ ६ स्थान सुधार गर्दै ४९औँ स्थानमा उग्लिएका हुन् ।
भारतीय ब्याटस्म्यान विराट कोहली कप्तान पौडेलभन्दा एक स्थानमा माथि छन् । कोहली ४८ औँ स्थानमा छन् । यस्तै, भारतीय क्रिकेट टिमका कप्तान रोहित शर्मा भने ५१औँ स्थानमा छन् ।
टी-२० को ब्याटिङ वरियतामा भारतका सूर्यकुमार यादव पहिलो, इङल्याण्डका फिल साल्ट दोस्रो र पाकिस्तानका मोहम्मद रिजवान तेस्रो स्थानमा रहेका छन् ।
ब्याटिङतर्फ दीपेन्द्रसिंह ऐरीको वरियता भने ६ स्थान खस्किएको छ । यसअघि ७०औँ स्थानमा रहेका दीपेन्द्र अहिले ७६औँ स्थानमा छन् ।
अलराउन्डरतर्फ भने ५ स्थान सुधार गर्दै दीपेन्द्र २२औँ स्थानमा उक्लिएका छन् । अलराउन्डरतर्फ नेपालकै कुशल मल्ल ३ स्थान सुधार गर्दै ३२औँ स्थानमा छन् । यस्तै, गुल्सन झा ६६औँ, रोहित पौडेल ७५औँ र करण केसी ८०औँ स्थानमा छन् ।
बलिङतर्फ भने टप सयमा नेपालका कुनैपनि खेलाडि परेका छैनन् ।
