काठमाडौँ । सत्तारुढ प्रमुख घटक नेकपा (एमाले) का अध्यक्ष केपी शर्मा ओलीले आफूलाई प्रधानमन्त्रीको इच्छा नभएको बताउनुभएको छ ।
बुधवार प्रतिनिधि सभा बैठकमा बोल्दै उहाँले प्रधानमन्त्री पुष्पकमल दाहाल, आफू र नेकपा एसका अध्यक्ष माधवकुमार नेपालबीच प्रधानमन्त्री पद १५/१५ महिनाका लागि बाँडफाँड गरेको समाचार आएकोमा आपत्ति जनाउँदै आफूलाई प्रधानमन्त्री बन्ने इच्छा नरहेको बताउनुभएको हो ।
अध्यक्ष ओलीले प्रधानमन्त्री पद बाँड्ने भन्ने समाचारले आफूहरुले बनाएको सत्ता समिकरणको गरिमालाई घटाएको जिकिर समेत गर्नुभयो । अब त केही गरांै राष्ट्र र जनताका लागि भनेर आफूहरुले नयाँ सत्ता समिकरण बनाएकाले प्रधानमन्त्री दाहालको पनि प्रधानमन्त्री पद बाँडफाँडको इच्छा नभएको ओलीलेल जिकिर गर्नुभयो ।
उहाँले भन्नुभयो, ‘आज प्रधानमन्त्रीको कार्यकाल १५/१५ महिना बाँडेको कुरा बजारभरी देख्छु । यसले यो सरकार किन परिवर्तन भएको हो ? यसमा नेताहरु सहकार्य किन गरेको हो भन्ने कुराको गरिमालाई घटाएको छ यस्ता खवरहरुको अनुचित सम्प्रेषण । यो गलत कुरा हो । न १३/१३ महिनाको सकैले सम्झौता गरेको छ न यो भागबण्डाको कुरा हो । प्रधानमन्त्री हुनकै लागि हामीले यस्तो गरेको होइन । मलाई यो प्रधानमन्त्रीको इच्छा पनि छैन । मेरो पनि नाम त्यहाँ जोडिएको छ क्यारे । यो प्रधानमन्त्रीको इच्छाको इच्छा पनि होइन । यो देशमा केही गरौं, अवत कमसेकम केही गरौँन । प्रधानमन्त्री जोसुकै होस् । मैले नेपाली काँग्रेसलाई पनि भने–कुरा गरौ न । यो देशको समस्याको समाधान कसरी गरौं भनेर ।’
अध्यक्ष ओलीले मुलुकमा केही गरौ भनेर आफूले काँग्रेससँग पनि पटकपटक प्रस्ताव गरेको पनि स्मरण गराउनु भयो ।
