काठमाडौं: प्रधानमन्त्री तथा नेकपा माओवादी केन्द्रका अध्यक्ष पुष्पकमल दाहालले प्रतिक्रियाबादीहरुले आफूलाई उपयोग गर्न खोजे लात्ताले हानेर निस्कने विवादास्पद अभिव्यक्ति दिनुभएको छ ।
‘शान्ति प्रक्रिया, गणतन्त्र र आजको राजनीति’ विषयक अन्तरक्रिया कार्यक्रमलाई राजधानीमा आज सम्बोधन गर्दै प्रधानमन्त्री दाहालले भन्नुभयो, प्रतिक्रियावादीहरुले दुरुपयोग गर्न खोजे म लात्ताले हानेर हिँड्ने व्यक्ति हुँ ।
निकै आक्रामक रुपमा सम्बोधन गर्नुभएका दाहालले आफूलाई पटकपटक घेराबन्दी गर्ने प्रयास भएको र त्यसलाई भत्काउँदै आएको बताउनुभयो । उहाँले भन्नुभयो, म नमर्दासम्म देशमा उथलपुथल भइ नै राख्छ । मलाई प्रतिक्रियावादी शक्तिहरुबाट घेरा हालेर सिध्याउने धेरै प्रयासहरु भए । घेरा तोड्दै आएका छौं, तोड्छौं । त्यसैले हामी क्रान्तिकारी शक्तिहरु एकै ठाउँमा आउने बाटो खोजौं ।’
दाहालले आफूमाथि अस्थिर चरित्रको भनेर आरोप लगाइने गरेको बताउँदै आफू देश र जनताप्रति मात्र इमान्दार रहने स्पष्ट गर्नुभयो । अध्यक्ष दाहालले आफू निरन्तरतामा क्रमभंगता गर्ने व्यक्ति भएको दाबी पनि गर्नुभयो । उहाँले भन्नुभयो, माओवाााााादीको सिद्धान्त र व्यवहार जमेको पोखरी होइन, गडगडाउने खोला हो ।
आफू निरन्तरताका क्रमभंगता गर्ने व्यक्ति भएको उल्लेख गर्दै बेलाबेलामा नयाँनयाँ परिस्थिति सृजना गर्ने उहाँले बताउनुभयो । उहाँले आफू नमर्दासम्म मुलुकमा उथलपुथल हुने बताउँदै आफू नेपाली जनता र नेपाल राष्ट्रको मात्र घोडा भएको बताउनुभयो ।
