काठमाडौँ । अनुष्का कुमारीको ह्याट्रिक प्रेरणामा भारतले शुक्रवार भुटानमाथि ७–० को रबाफिलो जित निकाल्दै साफ यु–१६ महिला च्याम्पियनसिपको शुरुवात गरेको छ ।
चार राष्ट्रको प्रतिष्पर्धा रहेको साफ यु–१६ नेपालमा शुक्रवारदेखि शुरु भएको छ । उक्त प्रतियोगिताको उद्घाटन खेलमा भारतले दक्षिण एशियाली फुटबलको कमजोर टोली भूटानमाथि गोल वर्षा गरेको हो । सातदोबाटोस्थित एन्फा कम्प्लेक्समा भारतका लागि अनुष्काले ह्याट्रिक पूरा गर्दै पर्ल फर्नान्डेजले दुई गोल गरिन् । कप्तान श्वेता रानी र अन्विता रघुरमनले समान एक गोल थपे । भारतले पहिलो हाफमा नै ६ गोल गर्दै भूटानमाथि पूर्ण रूपमा हाबी भयो । तर दोस्रो हाफमा भने भूटानले एक गोल मात्र बेहोर्यो ।
कप्तान रानीले खेलको छैटौं मिनेटमा नै गोल गर्दै अग्रता दिलाइन् । पर्लले १३ औं मिनेटमा गोल गर्दै अग्रता दोब्बर बनाइन् । त्यसको चार मिनेटपछि नै अनुष्काले गोल गरिन् । पर्लले २६ औं मिनेटमा व्यक्तिगत दोस्रो गोल गरेपछि भारत ४–० ले अगाडि रह्यो । एक मिनेट पनि नबित्दै अनुष्काले अर्को गोल थपिन् । उनले ४०औं मिनेटमा गोल थप्दै ह्याट्रिक पूरा गरिन् र पहिलो हाफमा भारत ६–० ले अगाडि रह्यो । दोस्रो हाफको ६१ औं मिनेटमा अन्विताले गोल गरेपछि भारतले ७–० को अग्रता बनायो ।
त्यसपछिको बाँकी समयमा थप गोल हुन सकेन र भुटानले हार व्यहो¥यो । जितसँगै भारतले तीन अंक जोडेको छ । भारतले आफ्नो दोस्रो खेलमा मंगलवार बंगलादेशको सामना गर्नेछ । नेपालले शनिवार बंगलादेशसँग खेल्दै प्रतियोगिताको शुरुवात गर्नेछ । खेल दिनको तीन बजे एन्फा कम्प्लेक्समा शुरु हुनेछ ।
