काठमाडौँ । त्रिकोणात्मक टी–२० सिरिज अन्तर्गत नेपालले आज नामिबियासँग प्रतिस्पर्धा गर्दैछ । नेपाल र नामिबियाबीचको खेल कीर्तिपुरस्थित त्रिवि मैदानमा बिहान ११ः३० बजे सुरु हुनेछ ।
जारी प्रतियोगितामा दुई टोली दोस्रोपटक भिड्न लागेका हुन् । यसअघि भएको खेलमा नामिबियाले नेपाललाई २० रनले पराजित गरेको थियो । नेपाललाई आजको खेल निकै महत्वपूर्ण रहेको छ । लगातार दुई खेलमा पराजित भएको नेपाल फाइनलको सम्भावना जिवितै राख्नका लागि पनि आजको खेल जित्नुपर्ने दबाबमा छ ।
नामिबिया जितलाई निरन्तरता दिन चाहन्च भने नेपाल नामिबियालाई पराजित गर्दै अघिल्लो खेलको बदला लिन चाहन्छ ।
यसअघि हिजो भएको खेलमा नामिबिया नेदरल्यान्ड्ससँग ५९ रनले पराजित भएको थियो । नेदरल्यान्ड्सले दुई खेल जितेको छ भने नामिबियाले एक खेल जितेको छ । नेपाल भने पहिलो जितको खोजीमा छ ।
विश्वकप लिग–२ खेल्न नेपाल आएका दुई टोली नामिबिया र नेदरल्यान्ड्ससँग नेपालले सिरिज खेलेको हो । हरेक टोलीले एक–अर्कासँग दुई–दुई खेल खेल्दैछन् । शीर्ष दुई टोलीले फाइनल खेल्नेछन् ।
