काठमाडौं । मछिन्द्र एफसी केपी ओली कप फुटबल च्याम्पियनसिपको फाइनलमा प्रवेश गरेको छ । बिहीबार भएको खेलमा भारतको मानेभन्ज्याङ्ग एफसीलाई ५–० गोल अन्तरले हराउँदै मछिन्द्र फाइनल प्रवेश गरेको हो ।
मछिन्द्रले २६ औं मिनेटमा बिमल घर्तिमगरको गोलबाट खेलमा अग्रता लिएको थियो । २८ औं मिनेटमा स्टेफन बियोङले मछिन्द्रको अग्रता दोब्बर बनाए ।
यस्तै, हिसुब थपलियाले ३६ औं मिनेटमा गोल गरेपछि पहिलो हाफमा मछिन्द्र ३–० ले अघि बढ्यो । दोस्रो हाफमा देबेन्द्र तामाङले र इन्जुरी समयमा आयुश घलानले गोल गर्दै मछिन्द्रलाई फराकिलो जित दिलाए ।
साविक विजेता समेत रहेको मछिन्द्रले उपाधिका लागि शनिबार न्युरोड टिम एनआरटीसँग प्रतिस्पर्धा गर्नेछ । न्युरोड टिम एनआरटीले आजै भएको पहिलो सेमिफाइनलमा जावलाखेल युथ क्लबलाई ३–० गोलअन्तरले पराजित गर्दै फाइनलमा स्थान बनाएको थियो ।
फाइनल खेल दशरथ रंगशालामा शनिबार हुनेछ ।
