एजेन्सी । भारतीय क्रिकेट बोर्ड (बीसीसीआई)ले वार्षिक सम्झौताको सूची सार्वजनिक गरेको छ । श्रेयस अय्यर र इशान किशनको नाम सिजन २०२३–२४ को लागि जारी गरिएको यो सूचीमा छैन । दुवै खेलाडीले घरेलु क्रिकेटमा भाग लिएका छैनन् । जसका कारण बोर्ड आक्रोशित बनेको हो ।
बीसीसीआईले आफ्नो विज्ञप्तिमा अय्यर र इशानलाई वार्षिक सम्झौता नदिएको बताएको छ । उत्तर प्रदेशका बायाँ हाते ब्याट्सम्यान रिंकु सिंहले ग्रेड सी मा स्थान पाएका छन् ।
ए प्लस ग्रेडमा कप्तान रोहित शर्मा बाहेक विराट कोहली, जसप्रित बुमराह र रविन्द्र जडेजा छन् ।
बीसीसीआईले यो वर्ष ३० खेलाडीलाई अनुबन्ध दिएको छ । यो अक्टोबर १, २०२३ देखि सेप्टेम्बर ३०, २०२४ सम्मको हो । बोर्डले यसपटक नयाँ परम्परा जारी गरेको छ । उसले फास्ट बलिङका लागि छुट्टै सम्झौता पनि गरेको छ । यो सूचीमा आकाश दीप, विजयकुमार वैश्यक, उमरान मलिक, यश दयाल र विद्वथ कावेरप्पा समावेश छन् ।
ग्रेड ए प्लसः रोहित शर्मा, विराट कोहली, जसप्रित बुमराह र रविन्द्र जडेजा ।
ग्रेड एः रविचन्द्रन अश्विन, मोहम्मद शामी, मोहम्मद सिराज, केएल राहुल, शुभमन गिल र हार्दिक पाण्ड्या ।
ग्रेड बीः सूर्यकुमार यादव, ऋषभ पन्त, कुलदीप यादव, अक्षर पटेल र यशस्वी जैसवाल ।
ग्रेड सीः रिंकु सिंह, तिलक वर्मा, रुतुराज गायकवाड, शार्दुल ठाकुर, शिवम दुबे, रवि बिश्नोई, जितेश शर्मा, वाशिंगटन सुन्दर, मुकेश कुमार, सञ्जु सामसन, अर्शदीप सिंह, केएस भरत, प्रसिद्ध कृष्णा, आवेश खान र रजत पाटीदार ।
खेलाडीले कति पैसा पाउँछन् ?
ग्रेड ए प्लसमा परेका खेलाडीले वार्षिक ७ करोड रुपैयाँ पाउँछन् । ए ग्रेडले ५ करोड र बी ग्रेडले ३ करोड रुपैयाँ पाउँछन् । सबैभन्दा कम सी ग्रेडमा परेका खेलाडीलाई १ करोड रुपैयाँ दिइन्छ ।
थप रूपमा, यस अवधिभित्र न्यूनतम तीन टेस्ट वा आठ एकदिवसीय वा १० टी–२० खेल्ने मापदण्ड पूरा गर्ने खेलाडीहरू स्वतः समानुपातिक आधारमा ग्रेड सी मा समावेश हुनेछन् । उदाहरणका लागि – ध्रुव जुरेल र सरफराज खानले अहिलेसम्म दुईवटा टेस्ट म्याच खेलेका छन्, यदि उनीहरूले इङ्ल्यान्डविरुद्ध जारी सिरिजको पाँचौं टेस्टमा भाग लिए भने उनीहरूलाई ग्रेड सी मा समावेश गरिनेछ ।
बीसीसीआईले सबै खेलाडीहरूले राष्ट्रिय टोलीको प्रतिनिधित्व नगरेको अवधिमा घरेलु क्रिकेटमा भाग लिन प्राथमिकता दिन सिफारिस गरेको छ ।
राहुल, शुभमन गिल र सिराज ए ग्रेडमा बढुवा भएका छन् । जहाँ सडक दुर्घटनाका कारण एक वर्षभन्दा बढी खेल्न नसकेका ऋषभ पन्तले ‘बी’ श्रेणीमा स्थान पाएका छन् । अक्षर पटेल गत सिजन ए ग्रेडमा थिए । यसपटक उनलाई बी ग्रेडमा राखिएको छ । हार्दिक, अश्विन र सिराजलाई ग्रेड ए मा राखिएको छ । रोहित, कोहली, बुमराह र जडेजा यसअघि पनि ग्रेड ए प्लसमा थिए ।
अजिंक्य रहाणे, चेतेश्वर पुजारा, उमेश यादव, शिखर धवन, दीपक हुडा र युजवेन्द्र चहल पनि यो सूचीमा पर्न सकेनन् । कुलदीप यादव सी बाट बी ग्रेडमा बढुवा भएका छन् । यशस्वी जैसवाल पहिलो पटक सम्झौता पाएर सीधै बी ग्रेडमा सामेल भएका छन् । सूर्यकुमार बी ग्रेडका एकमात्र खेलाडी हुन् जो अघिल्लो पटक पनि सोही ग्रेडमा परेका थिए ।
