काठमाडौं । फागुन १८ देखि २७ सम्म काठमाडौंमा आयोजना हुने साफ यू–१६ महिला च्याम्पियनसिपको तयारी पूरा भएको छ । प्रतियोगिताको टिकट दर साधारण पारापिटतर्फ १०० र भीआईपी पारापिटतर्फ ३०० कायम गरिएको छ । खेलको टिकट एन्फा कम्प्लेक्स सातदोबाटोमा भौतिक रुपमा लिन सकिने एन्फाले जनाएको छ ।
प्रतियोगितामा नेपाल सहित चार राष्ट्रले सिंगल राउण्ड रोविनका आधारमा प्रतिस्पर्धा गर्नेछन् । यस प्रतियोगिताका लागि चक्र तामाङ्गको प्रशिक्षणमा २३ सदस्यीय नेपाली राष्ट्रिय यू– १६ महिला टोली तयारी गरिरहेको छ ।
सहभागी टिमहरु नेपाल आइसकेको एन्फाले जनाएको छ । प्रतियोगिताको अनुमानित बजेट २ करोड १२ लाख २० हजार ९०० रुपैयाँ (१६२,४६८ अमेरिकी डलर) रहेको एन्फाले जनाएको छ ।
प्रतियोगिताको उद्घाटन खेल १८ फागुनमा भारत र भुटानबीच हुनेछ । घरेलु टोली नेपालले पहिलो खेल १९ फागुनमा बंगलादेशसँग खेल्नेछ । प्रतियोगितामा सहभागी ४ टोलीले राउण्ड रोबिन लिग खेलेपछि शीर्ष २ टिमले फाइनलमा स्थान बनाउनेछन् ।
प्रतियोगिताका खेलहरु Sportzworkz युट्युब च्यानलबाट प्रत्यक्ष प्रसारण गरिनेछ ।
