काठमाडौँ । म्यान्चेस्टर सिटी एफए कपको क्वाटरफाइनलमा प्रवेश गरेको छ । गएराति भएको खेलमा सिटीले लुटन टाउनलाई ६–२ गोलले पराजित गर्दै अन्तिम ८ को यात्रा तय गरेको हो ।
सिटीलाई फराकिलो जित दिलाउन एर्लिङ हालाण्ड एक्लैले ५ गोल गरे । यस्तै माटेओ कोभासिचले एक गोल गरे । लुटनका लागि दुबै गोल जोर्डन क्लार्कले गरेका थिए । जोर्डनले ४५ औं र ५२ औं मिनेटमा गोल गरेका हुन् ।
खेलको तेस्रो मिनेटमा नै हालाण्डले गोल गर्दै सिटीलाई सुरुवाती अग्रता दिलाएका थिए । त्यसपछि उनले १८,४०,५५ र ५८ औं मिनेटमा गोल गरे । कोभासिचले ७२ औं मिनेटमा गोल गरे । हालाण्डको चार गोलमा केभिन डी ब्रुएनाले असिस्ट गरेका थिए । डि ब्रुएनाले चार असिस्ट गरेका हुन् ।
