काठमाडौँ । अखिल नेपाल फुटबल संघ (एन्फा)को वार्षिक साधारणसभा काठमाडौँमा जारी छ । यसैबीच, साधारणसभामा बन्द सत्र सुरू हुनुअघि विवाद भएको छ । एन्फा कार्यसमितिको २१ मध्ये ११ जनाले उद्घाटन सत्रमा समेत भाग लिएनन् । राष्ट्रिय खेलकुद परिषदका सदस्यसचिव टंकलाल घिसिङले साधारणसभाको उद्घाटन सत्रको औपचारिक सुरु गरेका थिए ।
कार्यसमितिबाट पास नभएको एजेन्डा साधारणसभामा पेश गर्दै अनुमोदन गर्न लागेको भएको भन्दै वरिष्ठ उपाध्यक्ष वीरबहादुर खड्का, उपाध्यक्षद्वय दीर्घबहादुर केसी र विराटजंग शाही, केन्द्रीय सदस्यहरु रमेश व्यन्जनकार, अनिल मल्ल, भोजराज शाही, रविन्द्र चन्द, मनिष जोशी र रुपेश अधिकारीले बहिष्कार गरेका हुन्। उनीहरूले आइतबार एन्फामा अहसमति पत्र दर्ता गराएका थिए ।
यस्तै बी डिभिजनका १३ क्लबले पनि बन्दसत्र बहिष्कार गरेका छन् । एन्फाका पूर्व अध्यक्ष एवं ए डिभिजन क्लब हिमालय शेर्पाका अध्यक्ष कर्मा छिरिङ शेर्पाले कार्यसमितिका बहुमत सदस्यको उपस्थिति नरहेको साधारण सभाको औचित्य नरहने भन्दै सभाबाट बाहिरका थिए ।
अहिले साधारण सभाको बन्द सत्र जारी छ ।
