काठमाडौँ । आईसीसी पुरुष क्रिकेट विश्वकप लिग–२ को त्रिकोणात्मक शृङ्खला अन्तर्गत नेपालले आज नेदरल्यान्ड्ससँग प्रतिस्पर्धा गर्दैछ । नेपाल र नेदरल्यान्ड्सबीचको खेल कीर्तिपुरस्थित टियु मैदानमा बिहान ९ः३० बजे सुरु हुनेछ ।
यसअघिको खेलमा नेपालले नेदरल्यान्ड्समाथि सहज जित(९ विकेट) निकालेको थियो । आजको खेलमा पनि नेपाल उक्त नतिजालाई निरन्तरता दिन चाहन्छ । यता, नेदरल्यान्ड्स भने नेपाललाई बदला लिने रणनीतिका साथ मैदान उत्रनेछ ।
लिगमा २४ त्रिदेशीय शृङ्खलाअन्तर्गत पहिलो शृङ्खला नेपालमा भएको हो । आगामी सन् २०२७ सम्म चल्ने उक्त लिग–२ मा नेपालसहित आठ टोलीको सहभागिता हुनेछ । पहिलो सिरिजमा नेपाल, नामिबिया र नेदरल्यान्यड्सबीच प्रतिस्पर्धा भएको हो ।
चार खेलमा ३ जितसहित ६ अंक जोडेको नामिबिया अंकतालिकाको शीर्षस्थानमा छ । समान ३–३ खेलमा १–१ जित निकालेका नेपाल र नेदरल्यान्ड्स २–२ अंकका साथ दोस्रो र तेस्रो स्थानमा छन् । नेपाल रनरेटले नेदरल्यान्ड्सभन्दा अगाडी रहेको छ ।
